بالی ووڈ کے لیجنڈ اداکار نصیر الدین شاہ نے پاکستان میں سندھی زبان سے متعلق اپنے بیان پر غلطی کا اعتراف کیا تو پاکستانی سینئر اداکار عدنان صدیقی نے ردعمل دیتے ہوئے کہا کہ غلطی کا اعتراف کرنا انسان کی دانستگی کو ظاہر کرتا ہے۔
مائیکرو بلاگنگ سائٹ ٹوئٹر پر نصیر الدین شاہ کاٹوئٹ ری ٹوئٹ کرتے ہوئے اداکار عدنان صدیقی نے کہا کہ اپنی غلطی کا اعتراف کرنے کے لیے جرأت اور عاجزی کی ضرورت ہوتی ہے۔
اداکار نے مزید لکھا کہ ’اپنی غلطی پر معافی مانگنا درحقیقت انسان کی دانستگی کو ظاہر کرتا ہے، نصیر صاحب کے حالیہ بیان کی وجہ سے میرے دل میں ان کے لیے عزت مزید بڑھ گئی ہے، اپنی غلطیوں کو تسلیم کرنا اور ذمہ داری لینے کے لیے عاجزی اور جرأت کی ضرورت ہوتی ہے‘۔
یاد رہے کہ بالی ووڈ اداکار نصیر الدین شاہ نے 5 جون کو بھارتی یوٹیوبر کو دیے گئے انٹرویو میں برصغیر کی زبانوں پر بات کرتے ہوئے سندھی زبان سے متعلق بے بنیاد دعویٰ کرتے ہوئے کہا تھا کہ اب سندھی زبان پاکستان میں نہیں بولی جاتی۔
ان کی جانب سے پاکستان میں سندھی زبان نہ بولے جانے کے دعوے کے بعد جہاں پاکستانی شوبز شخصیات نے بھی ان کے دعوے پر رد عمل دیا تھا۔
پاکستانی ہدایت کار اور ڈائریکٹر یاسر نواز، دانش نواز اور اداکارہ منشا پاشا نے ایک ساتھ سندھی زبان میں کہا کہ وہ ایک دوسرے کے ساتھ آج بھی سندھی زبان بولتے ہیں۔