پاکستان اور بنگلہ دیش کے درمیان ٹی ٹوئنٹی سیریز کے بعدقومی جونیئر ہاکی ٹیم کا تر بیتی کیمپ کا اگلا مرحلہ امکان ہے کہ 30جنوری سے ایک ہفتے کے لئے دوبارہ شروع ہوگا، کیمپ میں ابتدائی طور پر60کھلاڑیوں کو مدعو کیا گیا تھا جس میں بعد بارہ کھلاڑیوں کو شارٹ لسٹ کیا گیا کیمپ میں موجود48کھلاڑیوں میں سے مزید دس کھلاڑیوں کو اگلے ایک ہفتے کے کیمپ میں شارٹ لسٹ کیا جائے گا، ٹیم کے دانش کلیم نے بتایا کہ کیمپ کے دوران کھلاڑیوں کی فٹنس پر زیادہ توجہ دی گئی، کھلاڑیوں کو ٹریننگ اور غذا کے حوالے سے چارٹ دیا گیا اور اس پر سختی سے عمل کرنے کی ہدایت کی گئی ہے۔ وزن بڑھنے کی صورت میں کھلاڑی کو پہلے دن ہی اگلے مرحلے میں کیمپ سے فارغ کردیا جائے گا۔
پاکستان ویٹرنز ہاکی ٹیم نے عمان کے خلاف تین میچوں کی ماسٹرز ہاکی سیریز جیت لی، سیریز کے اختتام پر رنگا رنگ تقریب میں وزیر اعلی سندھ کے معاون خصوصی برائے کھیل بنگل خان مہر نے فاتح کپتان قمر ابراہیم کووننگ ٹرافی دی، انہوں نے کہا کہ ویٹرنز ہاکی ٹیم کی آمد خوش آئند ہے، امید ہے دیگر ملکوں کی ٹیمیں بھی پاکستان آئینگی،انہوں نے کراچی میں چھ قومی ویٹرنز ہاکی ٹور نامنٹ کے حوالے سے بھی اپنے تعاون کا یقین دلایا، اس موقع پر اکیڈمی کے روح رواں سابق قومی ہاکی کپتان اصلاح الدین، قومی سلیکٹر ایاز محمود اور دیگر بھی موجودتھے۔جاپان کے شہرطوکیو میں 24 جولائی سے شروع ہونے والے اولمپک گیمز 2020 کے کاؤنٹ ڈاون کے سلسلے میں سافٹ بال فیڈریشن آف پاکستان کے زیر اہتمام کمشنر ہائو س میں خصوصی تقریب کا انعقاد کیا گیا۔
جس میں کمشنر کراچی افتخار شلوانی، اسکواش لیجنڈ جہانگیرخان، سابق ہاکی کپتان اصلاح الدین،
باکسر ملنگ بلوچ، سافٹ بال فیڈریشن کی چیئرپرسن تہمینہ آسف، سندھ اولمپک ایسوسی ایشن کے سیکریٹری جنرل احمدعلی راجپوت، فیڈریشن کے سیکریٹری جنرل آصف عظیم،جوائنٹ سیکریٹری محمدذیشان مرچنٹ، فنانس سیکریٹری مراد حسین، کوچ فراز اعجاز،پاکستان باکسنگ فیڈریشن کے نائب صدر اصغر بلوچ سمیت کھیلوں سے وابستہ دیگر شخصیات نے شرکت کی، اس موقع پر ٹوکیو اولمپک گیمزمیں سافٹ بال کے کھیل کی شمولیت کے حوالے سے اولمپک کے لوگوپرمبنی خصوصی طور پرتیار کیاگیاکیک کاٹا گیا، کمشنر کراچی افتخار شالوانی کی زیر صدارت ایک اجلاس میں پاکستان سپر لیگ کے ابتدائی انتظامات کا جائزہ لیا گیا ۔
فیصلہ کیا گیا کہ پی ایس ایل کے انعقاد کے موقع پر شہر کو بھرپور طور پر سجایا جائے گا خا ص طور پر کراچی نیشنل اسٹیڈیم سے ملنے والی شاہراہوں اور چوراہوں کو اور نمایاں دیواروں کو اس طرح سجایا جائے گا کہ کراچی میں کرکٹ فیسٹول جیسا ماحول ہو۔ کراچی میں ایک بڑی اسکرین نصب کی جائے گی تاکہ عام لوگ پی ایس ایل کے میچز سے محظوظ ہوسکیں۔گرلز نیٹ بال ٹور نامنٹ کےانڈر 19 فائنل میں ایلیٹ نیٹ بال کلب نے سٹی اسکول پی اے ایف کو مات دی ،جبکہ تیسری پوزیشن حبیب گرلز کالج نے حاصل کی، انڈر 17 کےفائنل میں حبیب گرلز اسکول نے سٹی اسکول پی اے ایف کو شکست دے دوچار کیا۔
انڈر 15 فائنل میں سٹی اسکول گلشن کو کراچی گرامر اسکول نے ناکامی سے دوچار کر کے ٹائٹل جیتا، مہمان خصوصی مسز نائلہ درانی پرنسپل سٹی اسکول پی اے ایف چیپٹر نے کھلاڑیوں میں انعامات تقسیم کئے اس موقع پر صدر پاکستان نیٹ بال فیڈریشن مدثر آرائیں ، سیکرٹری سید گوہر رضا اور سٹی اسکول ساوتھن ریجن کے اسپورٹس کوڈینٹر سید انتظار حیدر بھی موجود تھے۔پاکستان ویٹ لفٹنگ فیڈریشن نے نئے کھلاڑیوں کو گروم کرنے کے لئے اس ماہ کے آخر میں22جونیئر کھلاڑیوں کا طویل مدت تر بیتی کیمپ لگانے کا فیصلہ کیا ہے۔