اسلام آباد( کامرس رپورٹر )وفاقی حکومت کی جانب یکم جولائی سے وفاقی ملازمین کی بنیادی تنخواہ میں 10فیصد اضافے کا اطلاق خود مختار ، نیم خود مختار اور کارپوریشن کے ملازمین پر بھی ہوگا،وزارت خزانہ نے خودمختار ، نیم خود مختار اداروں اور کارپوریشنز کے ملازمین کی بنیادی تنخوا ہ میں 10فیصد اضافے کی منظوری دے دی ۔ وزارت خزانہ کی جانب سے جاری نوٹیفکیشن کے مطابق 10فیصد ایڈہاک ریلیف کا اطلاق وزارتوں اور ڈویژنوں کے خودمختار اداروں ، نیم خود مختاراداروں اور کارپوریشن کے ملازمین پر بھی ہوگا تاہم ان خود مختار ، نیم خود مختار اداروں اور کارپوریشنوں پر اس اطلاق نہیں ہوگا جن کے تنخواہ کے سکیل اور الائونسز مختلف ہیں ۔ تمام وزارتوں اور ڈویژنوں کو ہدایت کی گئی کہ وہ اپنے دائرہ کار میں آنیوالے خودمختار ، نیم خود مختار اداروں اور کارپوریشنوں کو اس کے اطلاق سے آگاہ کر دیں۔10فیصد اضافے کا اطلاق یکم جولائی 2021سے ہوگا۔