• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

میڈیااتھارٹی بل مسترد، آزادی صحافت پر آنچ نہیں آنے دینگے، نواز شریف

آج کا اخبار
اہم خبریں
21 اکتوبر ، 2021

لاہور(نمائندہ جنگ)پاکستان مسلم لیگ ن کے قائد سابق وزیراعظم پاکستان میاں محمد نوازشریف نے پاکستان میڈیااتھارٹی بل کو مستردکرتے ہوئے کہاہے کہ وہ اورپاکستان کی تمام اپوزیشن جماعتیں صحافیوں کے لانگ مارچ کی بھرپور حمایت کا اعلان کرتی ہیں ۔ گذشتہ روز لندن میں لاہور پریس کلب کے صدر ارشد انصاری سے میاں نوازشریف نے طویل ملاقات کی۔ اس موقع پر برطانیہ میں جرنلسٹ ایکشن کمیٹی کے کنوینئراورلاہور پریس کلب کے لائف ممبر اظہر جاوید بھی موجود تھے ۔ ارشد انصاری نے ملاقات میں میاں نوازشریف کو پاکستان میڈیااتھارٹی بل ، صحافت اور صحافیوں کو پاکستان میں درپیش مسائل سے تفصیلا آگاہ کیا ۔ میاں نوازشریف نے یقین دلایا کہ وہ پاکستان میں آزادی صحافت پر آنچ نہیں آنے دیں گے اورکہاکہ ہم مکمل طور پر صحافیوں کے مطالبات کے حق میں ہیں اور ہم آئین و قانون کی بالادستی پر مکمل یقین رکھتے ہیں، انشااللّٰہ آزادی صحافت بحال ہوگی اور آزادی صحافت میں ہم مکمل طور پر آپ کے ساتھ ہیں۔ میاں نوازشریف نے کہاکہ مجھے اندازہ ہے کہ اس وقت پاکستا ن میں صحافیوں سمیت عوام بری طرح مہنگائی کی دلدل میں دھنس چکے ہیں جس پر مجھے انتہائی تشویش ہے لیکن بہت جلد پاکستان پہلے کی طرح خوشحال ہوگا۔ میاں نوازشریف نے کہاکہ وہ پاکستان مسلم لیگ ن کے صدر میاں شہباز شریف اور مریم نوازکو ہدایت جاری کریں گے وہ صحافیوں کے شانہ بشانہ چلیں ۔

تازہ ترین