مارگلہ پارک پر تجاوزات، عدالت کا تحریری حکم نامہ جاری

11 دسمبر ، 2021

اسلام آباد ہائی کورٹ نے مارگلہ نیشنل پارک کی اراضی پر تجاوزات کے کیس کا تحریری حکم نامہ جاری کر دیا۔

عدالتِ عالیہ کے چیف جسٹس اطہرمن اللّٰہ نے 4 صفحات پر مشتمل حکم نامہ جاری کیا ہے جس میں کہا گیا ہے کہ ایڈیشنل اٹارنی جنرل نے عدالتی حکم پر قائم کمیٹی کی رپورٹ جمع کرائی، کمیٹی رپورٹ دارالحکومت اسلام آباد میں قانون کی حکمرانی کی ابتر حالت کی عکاس ہے۔

تحریری حکم نامے میں کہا گیا ہے کہ مارگلہ نیشنل پارک کےتحفظ میں ناکامی کے ماحولیاتی اثرات آئندہ نسلوں پر پڑیں گے، منسلک دستاویز میں مارگلہ نیشنل پارک کے تجاوزات والے علاقوں کی نشاندہی کی گئی ہے۔

عدالتی تحریری حکم نامے میں کہا گیا ہے کہ تجاوزات کی گئی جگہوں میں نیول گالف کلب بھی شامل ہے، ایڈیشنل اٹارنی جنرل مارگلہ نیشنل پارک میں 8603 ایکڑ اراضی کی الاٹمنٹ کی قانونی حیثیت سے مطمئن نہ کر سکے۔

اسلام آباد ہائی کورٹ نے اپنے تحریری حکم نامے میں کہا ہے کہ تسلیم شدہ تجاوزات اور ریگولیٹری اتھارٹیز کی غیر فعالیت نے مفادِ عامہ کے اہم سوالات کو جنم دیا، یہ پاکستان کے دارالحکومت میں قانون کی حکمرانی کی شرمناک غیر معمولی عکاسی ہے۔

تحریری حکم نامے کے ذریعے عدالتِ عالیہ نے حکم دیا ہے کہ اٹارنی جنرل، چیئرمین سی ڈی اے، وزیرِ اعظم کے معاونِ خصوصی ملک امین اسلم ذاتی طور پر پیش ہوں اور وضاحت کریں کہ پاکستان کے دارالحکومت میں قوانین کا نفاذ کیوں نہیں کیا جا رہا؟

یہ بھی پڑھیے

عدالت نے اپنے تحریری حکم نامے میں کہا ہے کہ وضاحت کریں کہ ایگزیکٹیو اتھارٹیز مارگلہ نیشنل پارک پر تجاوزات کرنے والے حکام کے خلاف کارروائی میں کیوں ناکام رہیں۔

تحریری حکم نامے میں اسلام آباد ہائی کورٹ نے مزید کہا ہے کہ الاٹمنٹس بظاہر سی ڈی اے آرڈینینس اور اسلام آباد وائلڈ لائف آرڈیننس کی بھی خلاف ورزی ہیں۔

عدالتِ عالیہ نے اپنے تحریری حکم نامے کے ذریعے یہ بھی بتایا ہے کہ کیس کی آئندہ سماعت 11 جنوری 2022ء کو ہو گی۔

تازہ ترین