ہندو انتہا پسندوں کاخوف، بھارتی مسیحی خودکو ہندو ظاہر کرنے پر مجبور

26 دسمبر ، 2021

نئی دہلی (جنگ نیوز )بھارت میں انتہا پسند جنونی ہندوؤں سے مسلمان اور دیگر اقلیتوں کی طرح عیسائی بھی محفوظ نہیں رہے۔یہ بھی انکشاف ہوا ہے کہ موت کے خوف سے عیسائیوں نے خود کو ہندو ظاہر کرنا شروع کردیا ہے۔

امریکی اخبار دی نیویارک ٹائمز نے بھارت میں عیسائیوں پر ہونے والے ظلم و بربریت سے متعلق تہلکہ خیز انکشافات پر مبنی خصوصی رپورٹ میں لکھا ہے کہ ہندو انتہا پسند عیسائیوں کی عبادت گاہوں کو نقصان پہنچاتے اور ان کو عبادت سے روکتے ہیں۔

نیو یارک ٹائمز کے مطابق ہندو انتہا پسند بھارت میں رہنے والے عیسائیوں کو زبردستی ہندو مذہب اختیار کرنے پر مجبور کر رہے ہیں۔ موت کے خوف سے عیسائیوں نے خود کو ہندو ظاہر کرنا شروع کردیا ہے۔

امریکی اخبار نیویارک ٹائمز کی رپورٹ میں یہ بھی لکھا ہے کہ عیسائیوں پر بڑھتے ظلم کی وجہ ہندو انتہا پسندانہ سوچ ہے جس کی وجہ سے اقلیت خود کو غیر محفوظ تصور کرتے ہیں۔

حال ہی میں عیسائیوں کے زیر انتظام چلنے والے ایک خیراتی ادارے کو ہندو انتہا پسند وکلا نے بند کروانے پر تُل گئے ہیں۔

نیو یارک ٹائمز کی رپورٹ میں انکشاف کیا گیا ہے کہ بھارتی وزیر اعظم نریندر مودی مسلمانوں کے قتل عام کے ساتھ ساتھ عیسائیوں کی نسل کشی پر بھی مکمل طور پر خاموش ہیں جس پر عالمی برادری کو شدید تحفظات ہیں۔

تازہ ترین