فرمان الہی
نماز کے اوقات
سندھ کے بڑے شہر نواب شاہ میں پیٹرول پمپ کی شاپ پر ڈکیتی کی واردات کا رنگ دے کر مذہبی تنظیم کے رہنما کو دہشت گردی کا نشانہ بنایا گیا، جس میں وہ جاں بحق ہو گئے جبکہ واقعے میں 1 ملزم بھی مارا گیا۔
واقعے کی سی سی ٹی وی فوٹیج نے صورتِ حال واضح کر دی، جس کی بنیاد پر پولیس نے تحقیقات شروع کر دی ہیں۔
پولیس ذرائع کے مطابق نواب شاہ کے پیٹرول پمپ پر شاپ میں گزشتہ رات فائرنگ کی گئی تھی۔
فائرنگ سے مالک سلیم رحمانی جاں بحق اور ان کے بھائی وسیم رحمانی شدید زخمی ہوئے تھے۔
ابتدائی طور پر اسے ڈکیتی کی واردات قرار دیا گیا تھا مگر واقعے کی سی سی ٹی وی فوٹیج سے صورتِ حال واضح ہو گئی ہے کہ یہ دہشت گردی کا واقعہ تھا جس میں ایک مذہبی تنظیم کے مقامی رہنما کو نشانہ بنایا گیا جس میں وہ جاں بحق ہو گئے۔
واقعے کی سی سی ٹی وی فوٹیج میں دیکھا جا سکتا ہے کہ شاپ پر لوٹ مار نہیں کی گئی بلکہ مسلح دہشت گرد نے اسٹور میں داخل ہوتے ہی فائرنگ شروع کر دی تھی۔
مسلح شخص کے ساتھی کی فائرنگ سے اس کا اپنا ہی ساتھی دہشت گرد ہلاک ہو گیا تھا۔
ہلاک دہشت گرد کی شناخت واجد میمن کے نام سے ہوئی ہے جس کا تعلق کالعدم سندھ ریولوشنری آرمی (ایس آر اے) سے ہے۔
