فرمان الہی
نماز کے اوقات
رواں سال سندھ پولیس کا 371 اہلکاروں پر مشتمل خصوصی دستہ اسلام آباد میں یوم پاکستان پریڈ 2022 میں شرکت کرے گا۔
پولیس ترجمان کے مطابق اسپیشل سیکیورٹی یونٹ ایس ایس یو کے 182 کمانڈوز، کراچی رینج کی مختلف ڈسٹرکٹ اور ٹریفک پولیس کے 131 اہلکار اور ریپڈ رسپانس فورس آر آر ایف کے 58 اہلکار اس دستے کا حصہ ہیں۔
سندھ پولیس کا ایک خصوصی دستہ جمعرات 10 فروری کو کراچی سے اسلام آباد کے لیے روانہ ہوگا۔
روایتی یوم پاکستان پریڈ 2022 جسے جوائنٹ سروسز پاکستان ڈے پریڈ بھی کہا جاتا ہے، ایک سالانہ تقریب ہے جو پریڈ گراؤنڈ شکرپڑیاں، اسلام آباد میں منعقد ہوتی ہے۔
اسپیشل سیکیورٹی یونٹ کی لیڈی کمانڈوز کے دستے نے سندھ پولیس کی نمائندگی کرتے ہوئے گزشتہ سال پہلی بار 81ویں یوم پاکستان پریڈ میں حصہ لیا تھا۔
ڈی آئی جی سیکیورٹی اینڈ ایمرجنسی سروسز ڈویژن ڈاکٹر مقصود احمد اس ایونٹ کے لیے سندھ پولیس کے فوکل پرسن ہیں۔
انہوں نے کہا کہ یہ سندھ پولیس کے لیے فخر کا لمحہ ہے کہ ان کا دستہ قومی ایونٹ میں شرکت کر رہا ہے۔
