فرمان الہی
نماز کے اوقات
پاکستان کے معروف یوٹیوبر، روسٹرو اداکار ارسلان نصیر پی ایس ایل کے 7 ویں ایڈیشن میں گزشتہ روز ہونے والے مقابلے میں عمر اکمل کو پہچاننے میں کنفیوز ہوگئے۔
گزشتہ روز عمر اکمل نے پی ایس ایل 7 میں کوئٹہ گلیڈی ایٹرز کی جانب سے کھیلتے ہوئے اسلام آباد یونائیٹڈ کے خلاف شاندار کارکردگی کا مظاہرہ کیا۔
تاہم، اداکار ارسلان نصیر کافی عرصے کے بعد عمر اکمل کو کھیلتے ہوئے دیکھ کر صحیح سے پہچان نہ سکے اور عمر اکمل کی بجائے کامران اکمل کی تعریف کردی۔
ارسلان نصیر نے مائیکرو بلاگنگ ویب سائٹ ٹوئٹر پر اپنے روایتی مزاحیہ انداز میں عمر اکمل کی بجائے کامران اکمل کی تعریف کرتے ہوئے اپنے ٹوئٹ میں لکھا کہ’ اُن کا اکّو واپس آگیا ہے، چیتا کامران اکمل‘۔
انہوں نے مزید لکھا کہ’ 300 سال کے بریک کے بعد (دی ممی ریٹرنز)‘۔
اداکار کے اس ٹوئٹ سے اندازہ لگایا جاسکتا ہے کہ اُنہیں عمر اکمل کو پہچاننے میں غلطی ہوئی ہے۔
ان کے اس مزاحیہ ٹوئٹ پر مداحوں کی جانب سے بھی دلچسپ تبصروں کا سلسلہ جاری ہے۔
ایک صارف نے لکھا ہے کہ’کامران اکمل؟؟؟ آپ نے کونسا میچ دیکھ لیا ہے؟‘۔
جبکہ کچھ صارفین کا کہنا ہے کہ’ ارسلان بھائی لگتا ہے ابھی تک شیزا اور فضا میں کنفیوز ہیں، کامران نہیں عمر تھا‘۔
خیال رہے کہ گزشتہ روز عمر اکمل نے پی ایس ایل 7 میں کوئٹہ گلیڈی ایٹرز کی جانب سے اسلام آباد یونائیٹڈ کے خلاف پہلا میچ کھیلا تھا، وہ دو برس کے بعد ایکشن میں دکھائی دیئے تھے، ان کی اننگز سنسنی خیز میچ میں کوئٹہ گلیڈی ایٹرز کی کامیابی کے لئے بڑی معاون ثابت ہوئی، انہوں نے 8 گیندوں پر تین چھکوں کی مدد سے 23 رنز بنائے تھے۔
