پاکستان مسلم لیگ ق کے رہنما مونس الہٰی نے عثمان بزدار کا استعفیٰ شیئر کردیا۔

مونس الہٰی نے عثمان بزدار کا صوبے کی وزارت سے دیا گیا استعفیٰ سوشل میڈیا پر شیئر کیا ہے۔

اپنے ٹوئٹر پیغام میں مونس الہٰی نے کہا کہ یہ لیں رانا صاحب اب اس استعفے کو آپ فریم کروا لیں۔

مونس الہٰی نے مسلم لیگ ن کے رہنما رانا ثناء اللّٰہ کی ایک پرانی ویڈیو بھی شیئر کی ہے ، جس میں وہ کہتے نظر آرہے ہیں کہ چوہدری پرویز الہٰی کو صرف استعفیٰ دکھایا گیا ہے ، میں سمجھتا ہوں انہیں چاہیے تھا کہ کم از کم اس کی فوٹو کاپی ہی دے دیتے۔

رانا ثناء کا کہنا تھا کہ چوہدری پرویز الہٰی کو چاہیے کہ وہ مونس الہٰی کو بھیجیں اور وہ مطالبہ کریں ان سے کہ ہمیں اس استعفیٰ کی فوٹو کاپی دے دیں۔

واضح رہے کہ گورنر پنجاب چوہدری محمد سرور نے وزیرِ اعلی سردار عثمان بزدار کا استعفیٰ منظور کرلیا۔

عثمان بزدار کا استعفیٰ سیاسی سمجھوتہ ہے، وزیراعظم

عمران خان نے کہا کہ وہ اتوار کو بڑا سرپرائز دیں گے، کپتان کبھی اپنی اسٹریٹجی شیئر نہیں کرتا، عدم اعتماد ملک کے خلاف ایک بہت بڑی بین الاقوامی سازش ہے۔

عثمان بزدار کا استعفیٰ منظور ہونے کے بعد پنجاب کابینہ بھی تحلیل ہو گئی۔

اس معاملے پر گورنر پنجاب چوہدری سرور نے وزیرِ اعظم عمران خان سے حتمی اجازت بھی لی۔

گورنر پنجاب چوہدری سرور نے نئے قائدِ ایوان (وزیرِ اعلیٰ) کے انتخاب کے لیے پنجاب اسمبلی کا اجلاس کل (2 اپریل کو) 11 بجے طلب کر لیا۔

استعفے کا متن

عثمان بزدار کی جانب سے پنجاب کی وزارتِ اعلیٰ سے دیے گئے استعفے میں کہا گیا ہے کہ جناب وزیرِ اعظم آپ کا مشکور ہوں، آپ نے اعتماد کر کے وزیرِ اعلیٰ کا عہدہ دیا۔

استعفے کے متن کے مطابق آپ کے اعتماد پر پورا اترنے کی ہمیشہ کوشش کی، اپنا استعفیٰ پیش کرتا ہوں۔

سردار عثمان بزدار نے اپنے استعفے میں وزیرِ اعظم کو مخاطب کر کے یہ بھی کہا ہے کہ آپ کے ساتھ کھڑا ہوں، آئندہ بھی کھڑا رہوں گا، آپ کی قیادت میں ہمیشہ کام کرنا قابلِ فخر سمجھوں گا۔