عدم اعتماد پر بحث کا وقت اب ختم ہو چکا، شیری رحمٰن

پاکستان پیپلز پارٹی کی نائب صدر شیری رحمٰن نے کہا ہے کہ عدم اعتماد پر بحث کا وقت اب ختم ہو چکا ہے، آج اسپیکر کو آئین، قواعد و ضوابط کے مطابق ہر حال میں ووٹنگ کرانی ہوگی۔

ایک بیان میں شیری رحمٰن نے کہا کہ ووٹنگ نہ کرانے پر اسپیکر آئین بلکہ توہین عدالت کے بھی مرتکب ہوں گے، اسپیکر کے پاس ووٹنگ میں تاخیر کا اب کوئی جواز نہیں۔

انہوں نے کہا کہ اسپیکر ایک بار آئین شکنی کرچکے ہیں، اب محتاط رہیں، عمران خان کو غیرآئینی طریقے سے بچانے کی کوشش پر عدالت نے اسپیکر کو آئین شکن قرار دیا ہے۔

ان کا یہ بھی کہنا تھا کہ باعزت طریقے سے استعفیٰ دینے کا وقت گزر چکا ہے، عمران خان اب آئین اور عدالتی فیصلے کے مطابق عدم اعتماد کا سامنا کریں، تقاریر اور احتجاج سے عدم اعتماد کی تحریک ختم نہیں ہوسکتی۔

عدم اعتماد کی قرار داد پر ووٹنگ، قومی اسمبلی کا اجلاس ساڑھے 12 بجے تک ملتوی

تحریکِ عدم اعتماد کی قرار داد قومی اسمبلی کے آج کے اجلاس کے ایجنڈے میں چوتھے نمبر پر ہے۔

خیال رہے کہ وزیرِ اعظم عمران خان کے خلاف تحریکِ عدم اعتماد کی قرار داد پر ووٹنگ کے لیے قومی اسمبلی کا اسپیکر اسد قیصر کی زیرِ صدارت شروع ہونے والا اجلاس ساڑھے 12 بجے تک ملتوی کر دیا گیا ہے۔