تجارتی اور سرکاری ٹوئٹر اکاؤنٹس سے معمولی فیس وصول کی جاسکتی ہے، ایلون مسک

04 مئی ، 2022

مائیکرو بلاگنگ سائٹ ٹوئٹر خریدنے والے ارب پتی ایلون مسک کا کہنا ہے کہ تجارتی اور سرکاری ٹوئٹر اکاؤنٹس سے معمولی فیس وصول کی جاسکتی ہے۔

ایلون مسک نے گزشتہ روز مائیکروبلاگنگ ویب سائٹ ٹوئٹر پر صارفین کو آگاہ کیا ہے کہ’ٹوئٹر ہمیشہ عام صارفین کے لیے مفت رہے گا لیکن تجارتی اور سرکاری صارفین سے مستقبل میں معمولی فیس وصول کی جاسکتی ہے‘۔

ایلون مسک پچھلے مہینے سے ٹوئٹر میں تبدیلیوں کے لیے مختلف قسم کی تجاویز پیش کر رہے ہیں۔

اُنہوں نے حال ہی میں ٹوئٹر کو خریدنے کے بعد کہا کہ وہ پلیٹ فارم کو کچھ نئی خصوصیات کے ساتھ آگے لے کر چلنا چاہتے ہیں، وہ اس الگورتھم کو اوپن سروس بنانا چاہتے ہیں تاکہ صارفین کے اعتماد میں اضافہ ہو سکے، بوٹس کو شکست دی جا سکے اور تمام انسانوں کی تصدیق ہو سکے۔

یاد رہے کہ ایلون مسک نے ٹوئٹرخریدنے کے معاہدے تک پہنچنے سے پہلے، ٹوئٹر بلیو پریمیم سبسکرپشن سروس کی فیس میں کمی کرنےاور اس کے علاوہ کچھ تبدیلیاں کرنے کی تجویز پیش کی تھی۔

خاص رپورٹ سے مزید