میکسیکو میں ای سگریٹ پر پابندی، صدارتی حکم نامہ جاری

01 جون ، 2022

میکسیکو نے حفظانِ صحت کے پیش نظر ملک میں الیکٹرانک سگریٹ اور دیگر ویپنگ ڈیوائسز پر پابندی لگادی ہے۔

میکسیکن صدر آندرے مینوئل نے کہا ہے کہ ای سگریٹس کے متعلق یہ دعویٰ کہ وہ تمباکو والی سگریٹ کاایسا متبادل ہیں جوکہ غیرنقصان دہ ہے، بالکل جھوٹ ہے۔

ان کا کہنا تھا کہ بخارات (ویپنگ ڈیوائس سے نکلنے والا دھواں) بھی صحت کے لیے نقصان دہ ہے۔

آندرے مینوئل نے گزشتہ روز انسداد تمباکو نوشی کے عالمی دن کے موقع پر ای سگریٹ پر پابندی کےحکم نامے پر دستخط کیے۔

انہوں نے ایک گلابی رنگ کی ویپنگ ڈیوائس دکھاتے ہوئے کہا کہ ’اس کا رنگ اور ڈیزائن دیکھیے، یہ نوجوانوں کو مائل کرنے کے لیے ہے۔‘

دارالحکومت میکسیکو سٹی کے حکام نے اس فیصلے کے بعد یہ اعلان کیا کہ شہر کے مرکزی اسکوائر زوکالو اور اس کے اطراف میں کسی بھی قسم کی سگریٹ پینے پر پابندی ہے۔

ڈپٹی وزیر صحت ہوگو لوپیز نے اس حوالے سے بتایا کہ میکسیکو نے پچھلے سال اکتوبر سے ویپنگ ڈیوائسز کی درآمد اور برآمد ممنوع قرار دی ہوئی ہے لیکن کمپنیاں اب تک اپنا بچا ہوا مال فروخت کر رہی ہیں۔

واضح رہے کہ عالمی ادارہ صحت بھی ای سگریٹ کو صحت کے لیے نقصان دہ قرار دے چکا ہے۔

ادارے کی رپورٹ کے مطابق، جولائی 2021 تک 30 سے زائد ممالک ای سگریٹس کی فروخت پر پابندی لگا چکے ہیں۔

بین الاقوامی خبریں سے مزید