فرمان الہی
نماز کے اوقات
سیؤل(مانیٹرنگ ڈیسک) ’اسکوئڈ گیم‘ کے مداح سال بھر سے نیٹ فلکس کے سب سے مشہور شو کے دوسرے سیزن کا انتظار کر رہے ہیں۔نیٹ فلکس نے اتوار کو جب اسکوئڈ گیم کے سیزن 2 کا اعلان کیا تو مداحوں میں خوشی کی لہر دوڑ گئی ہے۔اسکوئڈ گیم جنوبی کوریا کی شہرہ آفاق ویب سیریز ہے جس کا پہلا سیزن 2021 میں ریلیز کیا گیا تھا۔اسکوئڈ گیم کی کہانی ایک ایسے پُراسرار کھیل کے گرد گھومتی ہے، جس میں ایک دوسرے سے انجان لوگ ایک جزیرہ نما مقام پر جاتے ہیں جہاں انہیں مختلف کھیل کھیل کر پیسے جیتنے کا موقع دیا جاتا ہے۔کہانی میں دل دہلا دینے والی بات یہ ہے کہ کھیل کے دوران کسی بھی قسم کی غلطی کرنے پر کھلاڑی کو موقع پر ہی قتل کردیا جاتا ہے۔کھیل کے منتظمین ایک گڑیا کے ذریعے تمام کھیل چلاتے ہیں۔ ’اسکوئڈ گیم‘ کے سیزن 2 کے اعلان کے بعد سماجی رابطوں کی ویب سائٹ ٹوئٹر پر ایک صارف انجیلیکا کہتی ہیں کہ ’مجھ سے مزید انتظار نہیں ہورہا۔ میں کورین ٹی وی سیریز سے بہت پیار کرتی ہوں۔‘شیکھر نامی ایک صارف کہتے ہیں ’میری سبسکرپشن سیزن 2 کا انتظار کر رہی ہے۔ نئے چیلنج، نئی سنسنی دیکھنے کا انتظار نہیں ہورہا۔‘یاسمین نامی صارف نے نیٹ فلکس سے پہلے سیزن کے مشہور کردار ’چو سانگ وو‘ کو واپس لانے کی استدعا کی۔ ایک اور صارف نے کہا کہ ’سیزن دو کی تصدیق ہوگئی ہے اور جوش ایک نہایت معمولی لفظ ہے۔‘نیٹ فلکس کے مطابق اسکوئڈ گیم کے سیزن 2 میں مرکزی کردار سیوونگ جی ہون (لی جنگ جائے) کے علاوہ فرنٹ مین اور بقیہ کرداروں سمیت گڑیا کا بوائے فرینڈ بھی نظر آئے گا۔خیال رہے نیٹ فلکس کی جانب سے اسکوئڈ گیم سیزن 2 کی ریلیز کی تاریخ کا اعلان نہیں کیا گیا۔ تاہم اس کے سیزن 2 کے 2023 کے آغاز میں ریلیز ہونے کے امکانات ہیں۔
