پیٹرول کی قیمت بڑھاتے ہی غریبوں کو بچانے کے اقدامات کا اعلان

16 جون ، 2022

حکومت نے پیٹرولیم مصنوعات کی قیمتوں میں اضافے کے ساتھ ہی غریبوں کو بچانے کے لیے اقدامات کا اعلان بھی کردیا۔

اسلام آباد میں پریس کانفرنس کرتے ہوئے وزیر خزانہ مفتاح اسماعیل نے کہا کہ جو غریب لوگ پیٹرول کی قیمت برداشت نہیں کرسکتے وہ 786 پر اپنا شناختی کارڈ نمبر بھیجیں، ان کے ریکارڈ کا جائزہ لے کر انہیں ماہانہ 2 ہزار روپے دیے جائیں گے۔

وزیر خزانہ کا کہنا تھا کہ تازہ اقدام سے 60 لاکھ مزید پاکستانیوں کو فائدہ ہوگا، یہ رقم بےنظیر انکم سپورٹ پروگرام کے تحت دیے جانے والے اضافی 2 ہزار روپے کے علاوہ ہوگی۔

انہوں نے بتایا کہ حکومت کے اس امدادی پروگرام سے 8 کروڑ سے زائد پاکستانی فائدہ اٹھا سکیں گے۔

واضح رہے کہ حکومت نے تیسری مرتبہ پیٹرولیم مصنوعات کی قیمتوں میں اضافے کا اعلان کرتے ہوئے پیٹرول 24.3 روپے، ڈیزل 59.16 روپے،لائٹ ڈیزل آئل 39.16 روپے اور مٹی کا تیل 39.49 روپے فی لیٹر مہنگا کردیا ہے۔

ملک میں اب پیٹرول کی نئی قیمت 233.89 روپے، ڈیزل 263.31 روپے، مٹی کا تیل 211.43 روپے اور لائٹ ڈیزل آئل کی نئی قیمت 207.47 روپے ہوگئی ہے۔

قومی خبریں سے مزید