آسٹریلیا میں سام سنگ پر تقریباً 2 ارب کا جرمانہ

23 جون ، 2022

آسٹریلیا میں نامور موبائل کمپنی سام سنگ پر اپنے صارفین سے جھوٹ بولنے اور اشتہارات کے ذریعے گمراہ کرنے پر جرمانہ عائد کردیا گیا۔

خبر رساں ایجنسی کی رپورٹ کے مطابق آسٹریلیا کے مسابقتی ریگولیٹر نے کہا ہے کہ عدالت نے سام سنگ الیکٹرونکس آسٹریلیا پر 96 لاکھ 50 ہزار ڈالر (تقریباً 2 ارب پاکستانی روپے) کا جرمانہ لگایا۔

اس کا کہنا تھا کہ یہ جرمانہ کمپنی کے ان 9 اشتہارات کے باعث لگایا جس میں اس نے اپنے موبائل فون کو پانی سے محفوظ رہنے والا فون قرار دیا تھا۔

آسٹریلین کمپٹیشن اینڈ کنزیومر کمیشن (اے سی سی سی) نے اپنے بیان میں کہا کہ سام سنگ آسٹریلیا نے اشتہار کے ذریعے اپنے صارفین کو فون کے واٹر ریزسٹینس لیول ہونے سے متعلق گمراہ کرنے کا اعتراف بھی کرلیا۔

رپورٹ کے مطابق آسٹریلوی ریگولیٹر نے جولائی 2019 میں کمپنی کے خلاف مقدمہ دائر کیا تھا۔

دوسری جانب سام سنگ آسٹریلیا نے اپنے بیان میں کہا ہے کہ کمپنی کے نئے اور موجودہ موبائل فونز میں یہ مسائل موجود نہیں ہیں۔

تاہم آسٹریلوی ریگولیٹر نے کہا کہ مارچ 2016 اور اکتوبر 2018 کے درمیان کمپنی نے ایسے اشتہارات چلائے جن میں اس نے دعویٰ کیا تھا کہ ان کے موبائل فونز سوئمنگ پولز یا سمندری پانی میں بھی استعمال کیے جاسکتے ہیں۔

اے سی سی سی نے کہا کہ اسے ہزاروں کی تعداد میں شکایات موصول ہوئیں جن میں صارفین نے کہا کہ موبائل فون درست کام نہیں کرتے حتیٰ کہ پانی سے مکمل خراب ہوجاتے ہیں۔

سام سنگ کمپنی کا کہنا ہے کہ وہ اور آسٹریلوی ریگولیٹر فون میں ان تبدیلیوں پر رضامند ہوگئے تھے جو مارچ 2018 میں لاؤنچ ہوئے تھے اور ان موبائل فونز میں پانی سے خرابی کی کوئی شکایت سامنے نہیں آئی تھی۔

خاص رپورٹ سے مزید