فرمان الہی
نماز کے اوقات
زیتون کا تیل صدیوں سے غذاء کا اہم حصہ رہا ہے اور صحت بخش غذاء خصوصاً بحیرۂ روم کی خوراک میں اسے مرکزی حیثیت حاصل ہے، ذائقے، غذائیت اور طبی فوائد کی وجہ سے دنیا بھر میں اس کی مانگ مسلسل بڑھ رہی ہے تاہم زیتون کی پیداوار میں ایک ملک واضح طور پر سب پر برتری رکھتا ہے اور وہ ہے ’اسپین۔‘
اسپین کو دنیا کا سب سے بڑا زیتون کے تیل پیدا کرنے والا ملک تسلیم کیا جاتا ہے، یہ ملک ہر سال عالمی پیداوار کا بڑا حصہ فراہم کرتا ہے اور یورپ، شمالی امریکا اور ایشیا سمیت متعدد خطوں کو زیتون کا تیل برآمد کرتا ہے۔
غذائی ماہرین کے مطابق اسپین کی کامیابی کی بڑی وجوہات اس کا موزوں بحیرۂ روم جیسا موسم، وسیع زرعی رقبہ، جدید پیداواری ٹیکنالوجی اور صدیوں پر محیط زیتون کی کاشت کی روایات ہیں۔
اسپین کا جنوبی خطہ ’اندلوسیا‘ زیتون کی پیداوار کا مرکز سمجھا جاتا ہے جبکہ صوبہ ’خائین‘ کو ملک کے اندر ’زیتون کے تیل کا دارالحکومت‘ کہا جاتا ہے کیونکہ یہاں زیتون کی پیداوار غیرمعمولی حد تک زیادہ ہے۔
اسپین کے مشہور زیتون کے تیل کی متعدد اقسام
پیکوال: یہ قسم مضبوط ذائقے اور اینٹی آکسیڈنٹس سے بھرپور ہوتی ہے۔
اربیقینا: یہ قسم ہلکی، خوشبودار اور ذائقے میں کم ہوتی ہے۔
ہوجی بلانکا: اس کا ذائقہ متوازن اور اس میں گھاس اور بادام جیسی خوشبو پائی جاتی ہے۔
اسپین کی روزمرہ خوراک میں زیتون کا تیل بنیادی جزو کی حیثیت رکھتا ہے۔
سبزیوں کو بھوننے، سمندری غذاء پکانے اور روٹی پر ڈال کر کھانے تک، یہ تقریباً ہر کھانے میں استعمال ہوتا ہے۔
اگرچہ اٹلی اور یونان بھی زیتون کے تیل کے لیے مشہور ہیں لیکن وسیع باغات، مضبوط زرعی روایت اور عالمی برآمدات کی بدولت اسپین آج بھی دنیا کا ’زیتون کے تیل کا دارالحکومت‘ مانا جاتا ہے۔
