ایلون مسک آبادی میں اضافے کے خواہشمند کیوں؟

08 جولائی ، 2022

امریکی کمپنی ٹیسلا اور اسپیس ایکس کے بانی ایلون مسک دنیا کی آبادی بڑھانے کے خواہشمند ہیں۔

ایلون مسک نے مائیکرو بلاگنگ ویب سائٹ ٹوئٹر پر دنیا میں شرح پیدائش میں کمی پر تشویش کا اظہار کیا ہے۔

اُنہوں نے اپنے ٹوئٹ میں لکھا ہے کہ ’کم آبادی کے بحران پر قابو پانے میں مدد کے لیے اپنی پوری کوشش کر رہا ہوں‘۔

اُنہوں نے مزید لکھا ہے کہ ’دنیا میں کسی بھی تہذیب کو درپیش سب سے بڑا خطرہ گرتی ہوئی شرحِ پیدائش ہے‘۔

ایلون مسک نے اپنے ایک اور ٹوئٹ میں لکھا ہے کہ ’بہت سارے لوگ اس وہم میں مبتلا ہیں کہ زمین پر آبادی بہت بڑھ گئی ہے، حالانکہ شرحِ پیدائش کے رجحانات واضح طور پر آبادی کے خاتمے کی طرف جا رہے ہیں‘۔

واضح رہے کہ ایلون مسک دنیا کے واحد ایسے امیر ترین آدمی کے طور پر جانے جاتے ہیں، جو کہ زیادہ بچوں کی پیدائش کے حق میں ہیں۔