فرمان الہی
نماز کے اوقات
سپریم کورٹ بار کے صدر احسن بھون نے موجودہ حکومت کی قانونی حیثیت کھونے کے اعلامیے کی تردید کرتے ہوئے کہا ہے کہ سپریم کورٹ بار نے کوئی اعلامیہ جاری نہیں کیا۔
میڈیا سے گفتگو کرتے ہوئے صدر سپریم کورٹ بار احسن بھون نے کہا کہ موجودہ حکومت کو اپنا وقت پورا کرنا چاہیے۔
انہوں نے کہا کہ سپریم کورٹ بار کے ایک عہدیدار نے انفرادی طور پر بیان جاری کیا ہے۔
سپریم کورٹ بار کے صدر احسن بھون کا یہ بھی کہنا ہے کہ جاری کیے گئے بیان سے سپریم کورٹ بار کا کوئی تعلق نہیں۔
ان کا کہنا ہے کہ میڈیا رپورٹس سے معلوم ہوا کہ ایڈیشنل سیکریٹری ریاست گوندل نے اعلامیہ جاری کیا، انہوں نے ذاتی رائے دی۔
سپریم کورٹ بار کے صدر نے مزید کہا کہ سپریم کورٹ بار کا اعلامیہ صدر، سیکریٹری اور ایگزیکٹو کمیٹی ممبران کی مشاورت سے جاری ہوتا ہے۔
احسن بھون کا کہنا ہے کہ سپریم کورٹ بار ایسوسی ایشن قانون کی بالادستی پر یقین رکھتی ہے، اس کا کوئی سیاسی ایجنڈا نہیں۔
واضح رہے کہ سپریم کورٹ بار ایسوسی ایشن کی جانب سے جاری کردہ مذکورہ اعلامیے میں کہا گیا تھا کہ مسلم لیگ ن کی حکومت قانونی حیثیت کھو چکی ہے، عوام کا فیصلہ ہی کسی بھی حکومت کی قانونی بنیاد ہوتا ہے۔
