کراچی میں اسٹریٹ کرائم کی دلچسپ واردات، سوشل میڈیا پر ’جائز ڈکیتی‘ کے عنوان سے وائرل

کراچی میں اسٹریٹ کرائم کی مختلف وارداتوں کے حوالے سے کافی لے دے ہوتی رہتی ہے اور پولیس کو اکثر پریشانی کا سامنا بھی کرنا پڑتا ہے لیکن ڈسٹرکٹ سینٹرل کے حوالے سے منسوب 8 سیکنڈ کی ایک دلچسپ ویڈیو سوشل میڈیا پر ’جائز ڈکیتی‘ کے عنوان سے وائرل ہو رہی ہے۔

ویڈیو میں دیکھا جاسکتا ہے کہ سرخ شرٹ پہنے ایک بچہ گلی میں یوم پاکستان کی مناسبت سے تیز آواز میں ایک باجا بجاتے ہوئے جا رہا ہے کہ سامنے سے آنے والے موٹرسائیکل سوار دو نوجوان بچے سے باجا چھین کر فرار ہوجاتے ہیں۔

بچہ اس اچانک کارروائی میں بوکھلا کر موٹرسائیکل سواروں سے بچنے کی کوشش کرتا ہے پھر اگلے ہی لمحے سنبھل کر موٹرسائیکل سواروں کے پیچھے بھاگنے لگتا ہے۔

یہ معلوم نہیں ہو سکا کہ بچہ اپنا باجا بازیاب کروانے میں کامیاب ہوا یا نہیں؟ لیکن سوشل میڈیا پر یہ ویڈیو شہریوں کو کافی انٹرٹینمنٹ فراہم کرنے کا سبب بن رہی ہے۔

واضح رہے کہ 14 اگست کے قریب آتے ہی گلی کوچوں میں بچے ایسے باجوں کا بھی استعمال کرتے ہیں جن کی آواز لوگوں کو پریشان کردیتی ہے۔