فرمان الہی
نماز کے اوقات
رہنما پاکستان تحریک انصاف خرم شیر زمان کا کہنا ہے کہ کراچی کے ساتھ سوتیلی ماں کا سلوک کیا جا رہا ہے، جس لاڑکانہ نے بلاول کو ووٹ دیا وہاں انہوں نے کیا کیا؟
خرم شیر زمان نے سندھ ہائی کورٹ کے باہر میڈیا سے گفتگو کے دوران کہا کہ الیکشن کے وقت ایک سیاسی شخص ایڈمنسٹریٹر بٹھایا ہوا ہے، پیپلز پارٹی کی نالائقی کی وجہ سے کراچی کب تک سسکتا رہے گا؟
انہوں نے کہا کہ سندھ میں لاشیں پانی میں تیر رہی ہیں، لوگ بھوک پیاس سے مر رہے ہیں۔
خرم شیر زمان نے کراچی میں بلدیاتی انتخاب کے ملتوی ہونے سے متعلق بات کرتے ہوئے کہا کہ سمجھ نہیں آیا بلدیاتی الیکشن ملتوی کرنے کا اچانک کس کا فیصلہ تھا، کراچی میں نہ کوئی بارش ہے، نہ کہیں پانی کھڑا ہے۔
خرم شیر زمان کا کہنا تھا کہ لوگوں کو پانی نہیں مل رہا، سیوریج نظام بہتر نہیں، الیکشن ہوتے اور جو جیتتا وہ عوام کے مسائل حل کرتا۔
اُن کا مزید کہنا ہے کہ الیکشن کمیشن نے بددیانتی کرتے ہوئے پی پی اور ایم کیو ایم کو فائدہ دیا ہے۔
خرم شیر زمان نے یہ بھی کہا ہے کہ ہم نے کوئی الیکشن ملتوی کرنے کا نہیں کہا، اس فیصلے کے خلاف ہم آج عدالت میں آئے ہیں، سب سے زیادہ منتخب نمائندے ہمارے ہیں۔
