پاکستان سیاسی طور پر کہیں آگے بڑھ چکا ہے، عمران خان

05 ستمبر ، 2022

پاکستان تحریک انصاف (پی ٹی آئی) کے چیئرمین عمران خان کا کہنا ہے کہ پاکستان بدل چکا اور سیاسی طور پر کہیں آگے بڑھ چکا ہے۔

سماجی رابطے کی ویب سائٹ ٹوئٹر پر جاری کیے گئے اپنے بیان میں سابق وزیر اعظم عمران خان نے کہاکہ سیاسی شعور کی حامل اقوام ہی فِکر و وجود پر پڑی غلامی کی بیڑیاں توڑتی ہیں۔

انہوں نے کہا کہ گزشتہ دو ماہ کے دوران فیصل آباد میں یہ ہمارا دوسرا جلسہ تھا، ہمارا یہ اجتماع پہلے جلسے سے بھی بڑا تھا۔

عمران خان نے ٹوئٹر پر گزشتہ روز فیصل آباد میں ہونے والے جلسے کی ویڈیو بھی شیئر ہے۔

واضح رہے کہ فیصل آباد میں جلسہ عام سے خطاب کرتے ہوئے عمران خان نے کہا تھا کہ ملک میں سیاسی استحکام صرف الیکشن سے آئے گا ،نواز شریف اورآصف زرداری الیکشن سے اس لیے بھاگ رہے ہیں کہ یہ نومبر میں اپنی مرضی کا آرمی چیف لگانا چاہتے ہیں۔

انہوں نے کہاکہ امپورٹڈحکومت نے چارماہ میں ملک کا بیڑا غرق کردیاہے، قوم چوروں کو ہم پر مسلط کرنے والوں سے جواب مانگ رہی ہے،چوروں کو ہم پر مسلط کرنے والوں نے غداری کی،قوم کو حقیقی آزادی دلا کر رہیں گے۔

قومی خبریں سے مزید