اسمبلیاں تحلیل کرنے کے اعلان سے 13 جماعتوں کے ہوش اڑے ہوئے ہیں، فیاض چوہان

وزیرِ اعلیٰ پنجاب کے ترجمان فیاض الحسن چوہان کا کہنا ہے کہ اسمبلیاں تحلیل کرنے کے اعلان سے 13 جماعتوں کے ہوش اڑے ہوئے ہیں، یہی لوگ کہتے تھے الیکشن کرانا ہے تو کے پی اور پنجاب اسمبلیاں توڑ دیں۔

راولپنڈی میں پریس کانفرنس کرتے ہوئے فیاض الحسن چوہان نے کہا کہ عوام نے ثابت کیا کہ وہ عمران خان کے چاہنے والے ہیں، 26 نومبر کو راولپنڈی کی ہر گلی محلے سے عوام نے مارچ میں شرکت کی، ہم نے راولپنڈی کی عوام کی خدمت کی ہے، آئندہ بھی کریں گے۔

انہوں نے کہا کہ نواز شریف اور زرداری ٹولہ کہہ رہا ہے جلسے میں لوگ نہیں تھے، راولپنڈی کی تاریخ میں اتنا بڑا اجتماع آج تک نہیں ہوا، دس ہزار بیس ہزار کا فیگر دینے والوں کو چِلُو بھر پانی میں ڈوب مرنا چاہیے۔

پنجاب اور کے پی اسمبلی تحلیل کرنے پر آج اجلاس ہو گا، فواد چوہدری

پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ تحریک انصاف کی سینئر لیڈرشپ کا اجلاس آج طلب کر لیا گیا ہے۔

وزیرِ اعلیٰ پنجاب کے ترجمان کا کہنا ہے کہ عمران خان آئندہ جو بھی کال دیں گے راولپنڈی ان کے ساتھ کھڑا ہو گا، ہمارا نعرہ ہے صلح ہو کہ جنگ ہو عمران خان کے سنگ ہو۔

ان کا مزید کہنا ہے کہ اب عمران خان نے اعلان کیا تو یہی جماعتیں کہہ رہی ہیں آپ اسمبلیاں نہیں توڑ سکتے، شرجیل میمن نے کہا تھا کہ چوہدری پرویز الہٰی کبھی اسمبلیاں نہیں توڑیں گے۔

فیاض الحسن چوہان کا یہ بھی کہنا ہے کہ پرویز الہٰی دوستوں کا دوست یار باش آدمی ہے، انہوں نے کہا ہے خان صاحب اعلان کریں ایک منٹ میں اسمبلیاں توڑ دیں گے۔