سلمان خان، سری دیوی کے ساتھ کام کرتے ہوئے کیوں خوفزدہ تھے؟

01 فروری ، 2023

بالی ووڈ کے معروف اداکار سلمان خان عرف سلّو بھائی کی آنجہانی اداکارہ سری دیوی کے ساتھ کام کرنے سے گریز کرنے کی وجہ سامنے آگئی۔

سری دیوی ایک عمدہ اداکارہ ہونے کے ساتھ ساتھ طنز و مزاح پر بھی کمال کی مہارت رکھتی تھیں، ان کی موت کی وجہ سے جو خلا بھارتی فلم انڈسٹری میں پیدا ہوا ہے اس کو پُر کرنا ناممکن ہے۔

اداکارہ نے اپنے 5 دہائیوں سے زائد کے عرصے پر محیط فلمی کیریئر میں اپنی اداکاری کی شاندار صلاحیتوں سے فلمی شائقین کے دل جیتے۔

دیگر شوبز شخصیات کی طرح سلمان خان بھی ہندی فلم انڈسٹری کی پہلی خاتون سپر اسٹار کی صلاحیتوں کا اعتراف کرتے ہیں، اُنہوں نے سری دیوی کے ساتھ دو مشہور بالی ووڈ فلموں ’چندرا مکھی‘ اور ’چاند کا ٹکڑا‘ میں کام کیا، مداحوں کی جانب سے اس آن اسکرین جوڑی کو بہت پسند بھی کیا گیا اور یہ دونوں فلمیں باکس آفس پر کامیاب بھی رہیں۔

لیکن سلمان خان ان دو فلموں کے باکس آفس پر کامیاب ہونے کے باوجود بھی سری دیوی کے ساتھ کام کرنے سے گریز کرتے تھے۔

اُنہوں نے اپنے ایک انٹرویو میں انکشاف کیا کہ میں خوفزدہ تھا کہ سری دیوی کے ساتھ کام کرنے سے فلم میں میرا کردار گھٹ جائے گا اسی لیے میں نے دوبارہ سری دیوی کے ساتھ کام نہیں کیا۔

واضح رہے کہ سلمان خان اب فلم’کسی کا بھائی کسی کی جان‘ میں بڑی اسکرین پر جلوہ گر ہوں گے جوکہ عید کے موقع پر ریلیز ہوگی۔

انٹرٹینمنٹ سے مزید