بلال اشرف نے ڈرامہ انڈسٹری میں انٹری دینے کی وجہ بتادی

05 فروری ، 2023

پاکستانی فلم انڈسٹری کے معروف اداکار بلال اشرف نے بڑی اسکرین پر کامیابی حاصل کرنے کے بعد ٹیلویژن انڈسٹری میں قدم رکھنے کی وجہ بتا دی۔

بلال اشرف نے حال ہی میں ایک ویب شو میں بطور مہمان شرکت کی جہاں اُنہوں نے بڑی اسکرین سے شہرت حاصل کرنے کے بعد چھوٹی اسکرین کی طرف متوجہ ہونے کے بارے میں بتایا۔

کئی کامیاب پاکستانی فلموں میں اپنی شاندار اداکاری سے ناظرین کا دل جیتنے والے بلال اشرف نے ڈرامہ سیریل ’یونہی‘ کے ذریعے ٹیلیویژن کی دنیا میں قدم رکھنے کا فیصلہ کیا ہے۔

اُنہوں نے انکشاف کیا کہ مجھے کئی بار ڈراموں میں کام کرنے کی پیشکش ہوئی لیکن اس بار مایا علی اور ڈرامہ سیریل ’یونہی‘ کے ہدایت کار احتشام الدین کی وجہ سے اس پیشکش پر انکار نہیں کر سکا۔

بلال اشرف نے بتایا کہ میرا رجحان ڈراموں کی طرف اس لیے نہیں ہے کہ ڈرامے میں ایک دن میں کئی سین کی عکس بندی کی جاتی ہے، جبکہ فلم میں ایک یا دو سین ہی ہوتے ہیں۔

ان کا کہنا ہے کہ مگر پاکستانی ڈرامے اپنے بہترین معیار کی وجہ سے ایک ادارے کی حیثیت رکھتے ہیں اور ان سے بہت کچھ سیکھنے کو ملتا ہے۔

بلال اشرف نے بتایا کہ اپنی صلاحتیوں میں اضافہ کرنا چاہتا ہوں اس لیے پہلی مرتبہ چھوٹی اسکرین پر کام کا انتخاب کیا۔

اُنہوں نے اپنے کیریئر کے پہلے ڈرامے کی کہانی کے بارے میں بتایا کہ اس ڈرامے کی مصنف ثروت نظیر نے اپنی کہانی ’یونہی‘ کے ذریعے بہت سے پیغامات انتہائی سادگی اور خوبصورتی سے دیے ہیں۔

بلال اشرف نے مایا علی کے ساتھ کام کرنے کے تجربے کے بارے میں بات کرتے ہوئے کہا کہ اتنی زبردست اداکارہ کے ساتھ کام کرنے کا تجربہ ظاہر ہے اچھا ہی ہوتا ہے، میں نے ڈرامہ کرنا مایا علی سے ہی سیکھا ہے۔

یہ بھی پڑھیے

بلال اشرف ’یونہی‘ میں مایا علی کے مدمقابل ٹی وی ڈیبیو کریں گے

واضح رہے کہ اس سیریل میں مایا علی اور بلال اشرف کنیز فاطمہ اور داؤد کے مرکزی کرداروں میں جلوہ گر ہو رہے ہیں۔

یہ سیریل ان دونوں کرداروں کی زندگی کے مسائل اور معاشرے کی جانب سے دیے گئے چیلنجز کا احاطہ کرتے ہوئے ثقافتی اختلافات اور ان میں ضم ہونے کی کوششوں کو ہلکے پھلکے انداز میں پیش کرتی ہے۔

ڈرامہ سیریل کے دیگر نمایاں ستاروں میں بہروز سبزواری، دیپک پروانی، تزین حسین، طاہرہ امام، منظور قریشی، ماہا حسن، خاقان شاہ نواز، عظمیٰ بیگ، سعد فریدی، لائبہ خرم اور دیگر شامل ہیں۔

انٹرٹینمنٹ سے مزید