فرمان الہی
نماز کے اوقات
لاہور(پی پی آ ئی)بھارتی حکومت نے ’بیساکھی ‘کا تہوارمنانے کیلئے پاکستان جانے والے سکھ یاتریوں کے لئے خصوصی ٹرینوں کا انتظام کرنے سے انکار کر دیا ہے۔کشمیر میڈیا کے مطابق سکھ یاتری اب واہگہ بارڈر کے ذریعے پیدل پاکستان میں داخل ہوں گے اور پھر بس سے ننکانہ صاحب جائیں گے وہاں سے وہ پنجہ صاحب حسن ابدال جائیں گے۔پاکستان سکھ گوردوارہ پربندھک کمیٹی کے صدر سردار امیر سنگھ نے کہا کہ گزشتہ سال بھارتی یاتریوں کو مشترکہ چیک پوسٹ سے بسوں کے ذریعے واہگہ بارڈر تک لے جایا گیا تھا۔ بارڈر سے خصوصی ٹرینوں میں ننکانہ صاحب لے جایا گیا۔ انہوں نے کہا کہ اس عمل میں سکھ یاتریوں کو کافی مشکلات کا سامنا کرنا پڑا۔سردار امیر سنگھ نے کہا کہ اس سال خصوصی ٹرینیں معطل کر دی گئی ہیں اور یاتریوں کو بسوں کے ذریعے گوردوارہ جنم استھان ننکانہ صاحب اور دیگر مقامات پر لے جایا جائے گا۔سکھ یاتری کل پاکستان پہنچیں گے اور 18اپریل کو بھارت واپس جائیں گے۔بیساکھی کی مرکزی تقریب 14اپریل کو گوردوارہ پنجہ صاحب حسن ابدال میں ہوگی۔
