اونٹاریو دہشتگردی واقعے کو دو سال بیت گئے، متاثرہ خاندان کے عزیز و اقارب سے اظہارِ یکجہتی

کینیڈا کے صوبے اونٹاریو کے شہر لندن میں دہشتگردی کا شکار ہونے والے پاکستانی خاندان کے سانحہ کو دو سال گزر گئے، سیکڑوں افراد نے متاثرہ خاندان سے یکجہتی کا اظہار کیا۔

20 سالہ ملزم نتھینیل ویلٹمین نے سائیڈ واک پر کھڑی ہنستی بستی پاکستانی فیملی کے چار افراد سلمان افضال، ان کی اہلیہ مدیحہ سلمان، بیٹی یمنیٰ اور والدہ طلعت افضال پر پک اپ ٹرک چڑھا کر روند ڈالا تھا۔

کینیڈا میں قتل افضال فیملی کے بارے میں آپ کیا جانتے ہیں؟

کینیڈا میں مسلمان خاندان کو ٹرک سے کچلنے کے دہشتگردی کے واقعے میں قتل ہونے والی 44 سالہ مدیحہ سلمان انوارمینٹل انجینئرنگ میں پی ایچ ڈی کے آخری مراحل میں تھیں جبکہ بیٹی نویں جماعت کے امتحان دے رہی تھی۔

لندن اونٹاریو میں اس سانحہ کی یاد میں اُسی مقام پر سیکڑوں افراد جمع ہوئے اور متاثرہ فیملی کے عزیز و اقارب سے اظہارِ یکجہتی کیا۔ 

تقریب میں شہر کے میئر جوش مارگن، اسلاموفوبیا کے خاتمہ کے لیے نامزد کردہ کینیڈین نمائندہ عامرہ ایلغوابی اور اعلیٰ حکام شریک ہوئے۔

وزیرِاعظم جسٹن ٹروڈو نے اپنے بیان میں دہشت گردی کے اس واقعہ کی مذمت کرتے ہوئے کہا کہ ہم اسلاموفوبیا کے خاتمہ کے لیے اپنا کام جاری رکھیں گے۔

یاد رہے کہ ملزم کو وقوعہ کے روز ہی گرفتار کر لیا گیا تھا اور اس کے خلاف باقاعدہ ٹرائل 5 ستمبر سے شروع ہو رہا ہے۔