• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اشک اور اشعار … ……

انور شعور
آج کا اخبار
ادارتی صفحہ
29 ستمبر ، 2023

کس مان سے ہم آپ کے دربار آئے ہیں

چشمِ کرم حضور! گنہگار آئے ہیں

لاتے بھلا ہم آپ کی خدمت میں اور کیا

لے کر کچھ اشک اور کچھ اشعار آئے ہیں

سَو خامیوں، ہزار خطائوں کے باوجود

اُمیدِ التفات میں سرکار آئے ہیں

رحمت سے سرفراز کریں گے ضرور آپ

در پر ہم اس یقین سے سرشار آئے ہیں

دیکھے ہیں ایک مرتبہ روضے کے بام و در

لیکن خیال میں وہ لگاتار آئے ہیں

منزل تک اب رسائی کا امکان ہوگیا

تھا سدِراہ نفس، اُسے مار آئے ہیں

واپس تو آگئے ہیں وہاں سے مگر شعورؔ

ہم اُس دیار پر دل و جاں وار آئے ہیں

تازہ ترین