فرمان الہی
نماز کے اوقات
پاکستان میوزک انڈسٹری سے تعلق رکھنے والے معروف گلوکار علی حیدر تقریباً ایک دھائی کے بعد ایک بار پھر موسیقی کی دنیا میں قدم رکھنے کے لیے تیار ہیں۔
ڈیلس میں شاندار طریقے سے علی حیدر نے موسیقی کی دنیا میں واپسی کا سفر شروع کیا۔
فن ایشیاء تھیٹر ڈیلس میں گلوکار کے نئے گانے ’ڈھولن یار‘ کا ریڈ کارپٹ پریمیئر منعقد کیا گیا جس میں حاضرین ان کے گانے سے مسحور ہوتے رہے۔
اس تقریب میں ڈی ایف ڈبلیو سے تعلق رکھنے والے مختلف شعبوں کی نمایاں شخصیات نے شرکت کی، اس موقع پر فن ایشیاء کی جانب سے پارٹی کا اہتمام کیا گیا۔
علی حیدر کے مداحوں نے ان کی میوزک انڈسٹری میں واپسی پر خیر مقدم کیا، علی حیدر کا یہ نیا گانا اردو پنجابی ٹریک پر تشکیل دیا گیا ہے جس میں وائرسی بیٹس شامل ہیں، علی حیدر نے اس موقع پر ٹریک کو متعدی دھڑکنوں والا پنجابی اردو نمبر قرار دیا۔
علی حیدر نے میڈیا سے گفتگو کرتے ہوئے کہا کہ پاکستان اور بھارت میں موسیقی دونوں ملکوں کو جوڑنے کا کردار ادا کرتی ہے، پرانی جینز سے لیکر میرے کئی مقبول گانوں کو بھارت میں پزیرائی ملی اور اب میرا فن ایشیاء کے ہمراہ گانوں پر کام شروع ہوا ہے جو یہاں بھارت اور پاکستان کا امریکا میں ملاپ ہے۔
انہوں نے کہا کہ گانے کی ویڈیو میں فن ایشیاء فلمز کی مالکن ویشالی ٹھاکر نے اشتراک کر کے گانے کو چار چاند لگا دیے ہیں۔
فن ایشیاء کی سربراہ، ماڈل اور ڈانسر وشالی ٹھاکر نے اس موقع پر کہا کہ پاؤلو کوئیلو نے سچ کہا ہے کہ جب آپ کسی چیز کو دل سے چاہتے ہیں تو ساری کائنات آپ کو اس سے ملانے میں لگ جاتی ہے اور ایسا ہی کچھ میرے ساتھ بھی ہوا کہ ماڈلنگ سے کاروباری شخصیت کا سفر طے کرتی چلی گئی۔
انہوں نے اپنے شوہر سام ٹھاکر اور بیٹے سومل ٹھاکر کا تعاون کرنے پر شکریہ ادا کیا۔
ہدایت کار کامیجی کی ہدایت کاری میں بننے والے گانے ’ڈھولن یار‘ کی کمپوزیشن علی حیدر، موسیقی وکی علی نے ترتیب دی ہے۔
فن ایشیاء کی 5 ویں سالگرہ کے موقع پر سام ٹھاکر نے چند بڑے اعلانات بھی کیے اور حاضرین کو بتایا کہ ریڈیو کاروان اب فن ایشیاء کا حصہ ہے، اس طرح اب ڈیلس میں ہمارا مقابلہ کرنے والا کوئی ریڈیو باقی نہیں رہا۔
اس موقع پر وہاں موجود حاضرین نے سیم اور وشالی کو مبارک باد پیش کی۔
