سابق امریکی جج کیپریو کینسر میں مبتلا، روتے ہوئے دعاؤں کی اپیل

09 دسمبر ، 2023

عالمی شہرت یافتہ امریکی سابق جج فرینک کیپریو کینسر میں مبتلا ہو گئے، وہ سوشل میڈیا صارفین سے مکمل صحت یابی کے لیے دعاؤں کی درخواست کرتے ہوئے آبدیدہ ہو گئے۔

سابق جج فرینک کیپریو اپنے منصفانہ فیصلوں، عدل و انصاف، رحم دلی کے لیے دنیا بھر میں مشہور ہیں۔

ان کی مختلف عدالتی سماعتوں کی کئی ویڈیوز سوشل میڈیا پر وائرل ہیں اور دنیا بھر سے تعلق رکھنے والے لاکھوں صارفین انہیں ’دنیا کا بہترین جج‘ قرار دیتے ہیں۔

حال ہی میں انہوں نے سوشل میڈیا پر ایک ویڈیو پیغام اپنے مداحوں سے شیئر کیا ہے جس میں انہیں دعاؤں کی اپیل کرتے ہوئے آبدیدہ ہوتے ہوئے دیکھا جا سکتا ہے۔

انہوں نے اپنے ویڈیو پیغام میں بتایا ہے کہ انہوں نے حال ہی میں 27 نومبر کو اپنی 87 ویں سالگرہ منائی تاہم یہ سالگرہ دیگر تمام سالگرہ سے مختلف تھی کیونکہ کینسر کی تشخیص ہوئی ہے۔

انہوں نے سالگرہ کے موقع پر موصول ہونے والی مبارک باد اور نیک تمناؤں پر شکریہ ادا کرتے ہوئے اپنی صحت یابی کے لیے دعاؤں کی اپیل کی اور بتایا کہ میں امریکا کے 2 مختلف اسپتالوں میں زیرِ علاج ہوں، ڈاکٹر اپنا کام کر رہے ہیں لیکن اس کے ساتھ ہی دعاؤں کی بھی سخت ضرورت ہے کیونکہ اس مشکل وقت میں دعاؤں سے بڑھ کر اور کوئی ہتھیار نہیں ہے۔

واضح رہے کہ فرینک کیپریو رواں سال کے آغاز میں 40 برس تک خدمات انجام دینے کے بعد اپنے عہدے سے مستعفی ہو گئے تھے۔

انہوں نے رہوڈ آئی لینڈ کی میونسپل کورٹ میں بطور چیف جج اور رہوڈ آئی لینڈ بورڈ آف گورنرز اینڈ ایجوکیشن میں بطور چیئرمین خدمات انجام دیں۔

بین الاقوامی خبریں سے مزید