شیخ جعفر خان مندوخیل نے گورنر بلوچستان کے منصب کا حلف اٹھالیا

نئے نامزد گورنر بلوچستان شیخ جعفر مندوخیل نے اپنے منصب کا حلف اٹھا لیا۔

بلوچستان ہائی کورٹ کے چیف جسٹس جسٹس محمد ہاشم کاکڑ نے گورنر سے عہدے کا حلف لیا۔

تقریب میں سبکدوش گورنر ملک عبدالولی کاکڑ اور وزیر اعلیٰ سرفراز بگٹی بھی شریک ہوئے۔

اس کے علاوہ تقریب میں صوبائی وزراء، اراکین اسمبلی، سیاسی شخصیات اور حکام نے بھی شرکت کی۔

واضح رہے کہ شیخ جعفر خان مندوخیل بلوچستان کے 24 ویں گورنر بن گئے ہیں۔

وفاق اور صوبے کے درمیان پل کا کردار ادا کروں گا، گورنر بلوچستان

گورنر بلوچستان شیخ جعفر خان مندوخیل نے حلف برداری کے بعد میڈیا سے بات چیت کرتے ہوئے کہا کہ وفاق اور صوبے کے درمیان پل کا کردار ادا کروں گا، صوبے کے مسائل اور مشکلات کے حوالے سے وفاقی حکومت سے بات کی جائے گی۔

جعفر مندوخیل کا کہنا ہے کہ صوبے میں گورننس کے حوالے سے بہتری کی گنجائش ہے، گوادر میں باڑ لگانے کے حوالے سے علم نہیں، اگر سیکیورٹی مقاصد کے لیے لگائی جا رہی ہے تو اچھی بات ہے۔