ہم چاہتے ہیں ترک کمپنیاں سندھ میں سرمایہ کاری کریں، وزیراعلیٰ سندھ

کراچی ( اسٹاف رپورٹر) وزیراعلیٰ سندھ سید مراد علی شاہ نے کہا ہے کہ ہم چاہتے ہیں کہ ترکی کی کمپنیاں سندھ میں سرمایہ کاری کریں،یہ بات انھوں نے ترکیہ کے سفیر ڈاکٹر پیکاسی سے ملاقات میں کہی، وزیر اعلیٰ ہاوس میں ہونے والی ملاقات میں دو طرفہ تجارت بڑھانے پر تبادلہ خیال کیا گیا ، سید مراد علی شاہ نے کہا کہ وفاقی حکومت آئندہ تین سالوں میں ترکی سے تجارت پانچ ارب ڈالر تک لانا چاہتی ہے، کراچی ملک کا تجارتی مرکز ہے، دونوں ملکوں کے مابین برآمد کا جائزہ لے کر ایسے سامان کی تیاری کی جائے جو ایک دوسرے کی ضرورت ہوں، 1995سے 2022تک ترکی کے ساتھ 89.8ملین ڈالر جبکہ گزشتہ سال تقریبا 900ملین ڈالر کی تجارت ہوئی،وزیراعلی سندھ نے کہا کہ پاکستان نے ترکی کو کاٹن، سیمنٹ، الیکٹرونکس اشیا ایکسپورٹ کی ہیں ، ترکی کے سفیر نے کہا ترکی ٹگ بوٹ جوکہ سمندری جہاز کو کھیچنے والی کشتی ہے پاکستان سے لیتا ہے۔