رینجرز اور پولیس کی مشترکہ کارروائی، انتہائی مطلوب ملزم محمد حامد عرف پیا گرفتار

کراچی( اسٹاف رپورٹر )پاکستان رینجرز (سندھ) اور ضلع سٹی پولیس نے انٹیلی جنس معلومات کی بنیاد پر مشترکہ کارروائی کرتے ہوئے عید گاہ سے انتہائی مطلوب ملزم محمد حامد عرف پیا کو گرفتار کر لیا۔ ملزم کے قبضے سے ایک عدد ہینڈ گرنیڈ برآمد کر لیا گیا۔ترجمان رینجرز کے مطابق ملزم سال 2009 تک ایم کیو ایم حقیقی کے لیئے کام کر تا رہا ہے اور اس کے بعد ایم کیو ایم لندن گروپ میں شامل ہو گیا۔ملزم کراچی میں لسانی،سیاسی اور مخالفین کی ٹارگٹ کلنگ کے علاوہ ڈکیت گروہ کا سرغنہ بھی رہا ہے۔ ترجمان نے بتایا کہ ابتدائی تفتیش کے دوران ملزم نے 1994 سے اپریل 2014 تک ٹارگٹ کلنگ میں ملوث ہونے کے ساتھ ساتھ ایک پولیس اہلکار کی ٹارگٹ کلنگ میں ملوث ہونے کا اعتراف کیا ہے۔ ملزم نے 2007سے 2008 تک اپنے ساتھیوں کے ہمراہ کراچی کے مختلف علاقوں میں بینک ڈکیتیوں،4 جیولری شاپس سے 123 تولا سونا لوٹنے اور قیمتی سامان سے بھرے ہوئے کنٹینرز کو لوٹنے کے علاوہ لیاری گینگ وار کے ہمراہ بھتہ وصولی میں بھی ملوث ہونے کا انکشاف کیا ہے۔ ملزم نے مزید انکشاف کیا کہ وہ کراچی میں ایم کیو ایم لندن گروپ اور لیاری گینگ وار کو درجنوں کلاشنکوف، ایل ایم جی اور ہزاروں کی تعداد میں ایمو نیشن بھی سپلائی کرتا رہا ہے جو کہ کراچی میں دہشت گردی کے لیئے استعمال ہوتا رہا ہے۔ ملزم 2014 سے سکھر، پشاور، اسلام آباد میں روپوش رہ چکا ہے۔ملزم کے خلاف مختلف تھانوں میں 11 ایف آئی آر بھی درج ہیں۔ملزم کے دیگر ساتھیوں کی گرفتاری کے لیئے چھاپے مارے جا رہے ہیں۔ گرفتار ملزم کو برآمد شدہ ہینڈ گرنیڈ سمیت مزید قانونی کارروائی کے لیے پولیس کے حوالے کر دیا گیا ہے۔