لندن انڈر گراؤنڈ پر وکٹوریہ لائن سب سے گرم ترین لائن ہے، ٹرانسپورٹ فار لندن

لندن (پی اے) لندن انڈر گراؤنڈ پر وکٹوریہ لائن سب سے گرم ترین لائن ہے۔ ٹرانسپورٹ فار لندن (ٹی ایف ایل) کے اعداد و شمار سے پتہ چلتا ہے کہ  2023میں پلیٹ فارم کا اوسط درجہ حرارت 28.2C تھا حالانکہ جون اور اکتوبر کے درمیان اوسط 30C سے اوپر تھا۔ اگلی گرم ترین لائنیں سنٹرل (26.7) اور بیکرلو (26.0C) تھیں جن میں ایئرکنڈیشنڈ سرکل، ہیمرسمتھ اینڈ سٹی، ڈسٹرکٹ اور میٹروپولیٹن لائنیں سب سے بہترین (19.3C) تھیں۔ ٹی ایف ایل کا کہنا ہے کہ اس نے وکٹوریہ لائن پر اپنے 13وینٹی لیشن شافٹ کی صلاحیت کو دوگنا کرنے سمیت نئے وینٹی لیشن یا کولنگ سلوشنز لگا کر ہر اسٹیشن اور سرنگ کے ماحول سے گرمی کو ہٹا دیا ہے۔ 2013 میں وکٹوریہ لائن کا اوسط درجہ حرارت 21.9C ریکارڈ کیا گیا تھا یعنی ایک دہائی میں درجہ حرارت 6C سے زیادہ بڑھ گیا ہے۔ ٹی ایف ایل کے مطابق ٹیوب پر پلیٹ فارم کے درجہ حرارت کو ڈیٹا لاگرز کا استعمال کرتے ہوئے معمول کے مطابق مانیٹر کیا جاتا ہے۔ دس سال پہلے بیکرلو، سنٹرل، پکاڈلی اور ناردرن اور لائنیں گرم ترین ٹیوب لائنیں تھیں لیکن سبھی کا اوسط درجہ حرارت 26C سے کم تھا۔ لندن اوور گراؤنڈ اور الزبتھ لائن کے اعداد و شمار کو معلومات کی آزادی کی درخواست کے جواب میں شامل نہیں کیا گیا تھا۔ درجہ حرارت بہت زیادہ ہونے کے بارے میں گزشتہ سال 49 شکایات موصول ہوئی تھیں۔ پندرہ لوگوں نے ٹیوب کے بہت ٹھنڈے ہونے کی شکایت کی۔ ٹی ایف ایل کے کسٹمر آپریشنز کے ڈائریکٹر نک ڈینٹ نے کہا کہ ہم اس بات کو یقینی بنانے کے لئے سخت محنت کر رہے ہیں کہ ہماری ٹرانسپورٹ سروسز زیادہ شدید اور بار بار گرم موسم کے واقعات کے دوران لچکدار رہیں۔ ہم نے نئی ٹرینوں پر توانائی کے موثر اقدامات کئے ہیں، جو توانائی کی بچت کرتے ہیں اور پیدا ہونے والی گرمی کو کم کرتے ہیں۔ اس میں ایئرکنڈیشنگ شامل ہے، جو اب زیر زمین نیٹ ورک کا 40 فیصد احاطہ کرتا ہے، وکٹوریہ اور جوبلی دونوں لائنوں پر بہتر سرنگ وینٹی لیشن سسٹم، اور سینٹرل لائن پر ہم نے ریل گاڑیوں کو ٹھنڈا رکھنے کے لئے ٹرین کی چھتوں اور کھڑکیوں پر فلمیں نصب کی ہیں۔