ریاست منی پور میں تشدد کے ذمہ دار وزیراعظم، مرکزی وزارت داخلہ مکمل ناکام ہوچکی، کانگریس

نئی دہلی (اے پی پی) کانگریس نے کہا ہے کہ ریاست منی پور میں تشدد کے ذمہ دار وزیر اعظم نریندر مودی ہیں ، مرکزی وزارت داخلہ منی پور کے معاملے میں مکمل طور پر ناکام ہو چکی ہے لہذا وزیر داخلہ امیت شاہ کو برطرف کیا جانا چاہیے۔کشمیر میڈیاسروس کے مطابق کانگریس کی ترجمان اور سوشل میڈیا سیل کی سربراہ سپریا شرینیٹ نے صحافیوں سے گفتگو کرتے ہوئے کہا کہ وزیر اعظم نریندر مودی نے دینا کے کئی ملکوں کے دورے کیے لیکن انہیں منی پور جانے کا وقت نہیں ملا۔ انہوں نے کہا کہ سولہ ماہ سے زائد عرصہ گزر چکا منی پور بدستور جل رہا ہے۔ یاد رہے کہ منی پورمیں گزشتہ برس تین مئی سے حالات سخت کشیدہ ہیں، اب تک دو سو سے زائد افراد ہلاک ہو چکے ہیں،تاہم رواں ماہ کے آغاز میں تشدد کا سلسلہ ایک مرتبہ پھر تیز ہو گیا ۔ ریاستی حکومت نے گزشتہ روز پوری ریاست میں انٹرنیٹ سروس پانچ روز کےلئے معطل کر دی ۔