آئینی ترامیم کا مسودہ میرے پاس آنے سے پہلے وزیر قانون نے ججز کو بتایا، بلاول بھٹو

02 اکتوبر ، 2024

چیئرمین پاکستان پیپلز پارٹی (پی پی پی) بلاول بھٹو زرداری نے کہا ہے کہ آئینی ترامیم کا مسودہ پہلے ان کے پاس نہیں آیا، بلکہ پہلے وزیر قانون نے سپریم کورٹ میں جا کر ججوں کو بتایا کہ ہم آئینی ترامیم کے ذریعے عدلیہ سے متعلق ریفارمز لا رہے ہیں۔

ایک انٹرویو میں بلاول بھٹو نے کہا کہ جیسے ہی عدلیہ اصلاحات ججز کے علم میں آئی، سپریم کورٹ کا مخصوص نشستوں پر فیصلہ آگیا، مخصوص نشستوں کا فیصلہ آنے سے ہمارے نمبرز جو پورے تھے انہیں کم کردیا گیا۔

انہوں نے کہا کہ سپریم کورٹ کا فیصلہ جوڈیشل ریفارمز میں براہ راست عدالتی مداخلت تھی، جب بات عدالت کی طاقت کم کرنے کی آئی تو عدلیہ کا ادارہ اکٹھا ہوگیا۔

یہ بھی پڑھیے

بلاول بھٹو نے کہا کہ بامعنی مذاکرات سے ہی سیاسی استحکام آسکتا ہے، سیاسی استحکام کےلیے ہم نے حکومت کے ساتھ تعاون کیا۔

چیئرمین پی پی پی نے کہا کہ پی ٹی آئی کے فیصلے کرنے والوں کی سوچ ہے کہ ملک کو چلنے نہیں دینا، پی ٹی آئی چاہتی ہے کہ معیشت اور سیاسی نظام مفلوج ہوجائے، پی ٹی آئی چاہتی ہے ہمارا عدالتی نظام ناکام رہے۔

بلاول بھٹو زرداری نے کہا کہ شہباز شریف نے اپنی حکومت بنانے سے پہلے پی ٹی آئی کو حکومت بنانے کی دعوت دی، لیکن پی ٹی آئی نے حکومت بنانے کی کوشش نہیں کی۔ صدر اور وزیراعظم نے پی ٹی آئی کو میثاق معیشت پر انگیج کرنے کی بار بار کوشش کی۔

انہوں نے کہا کہ پی ٹی آئی نے آئی ایم ایف کی ہر ڈیل کو سبوتاژ کرنے کی کوشش کی، پی ٹی آئی نے حکومت سے جاتے ہوئے معیشت پر ایٹم بم پھینکا۔

بلاول بھٹو نے کہا کہ شہباز شریف کی حکومت مہنگائی کی شرح سنگل ڈیجٹ پر لائی، یہ مثبت چیز ہے۔

انہوں نے کہا کہ فلسطین اور کشمیر میں عالمی قوانین پر عمل درآمد نہ ہونے سے خطے میں عدم استحکام ہے، خطے میں کشیدگی سے پوری دنیا متاثر ہوگی، فلسطین میں امن و امان کے حوالے سے خطرہ بڑھتا جارہا ہے، مشرق وسطیٰ میں کشیدگی کسی کے مفاد میں نہیں۔

قومی خبریں سے مزید