دیہی خواتین محنت، محبت، قربانی کی زندہ مثال ہیں: مریم نواز

15 اکتوبر ، 2024

**وزیرِ اعلیٰ پنجاب مریم نواز ـــ فائل فوٹو**

وزیرِ اعلیٰ پنجاب مریم نواز کا کہنا ہے کہ دیہی خواتین محنت، محبت، احساسِ ذمے داری اور قربانی کی زندہ مثال ہیں۔

مریم نواز نے دیہی خواتین کے عالمی دن پر اپنے خصوصی پیغام میں کہا کہ دیہی خواتین کی عظمت، قربانی اور انتھک محنت کو خراجِ تحسین پیش کرتے ہیں۔

اُنہوں نے کہا کہ زرعی معیشت کے استحکام میں دیہی خواتین کی کاوشیں قابلِ تحسین ہیں۔

وزیرِ اعلیٰ پنجاب نے کہا کہ دیہی خواتین کا کاشت کاری اور لائیو اسٹاک کے فروغ میں بھر پور کردار قابلِ تحسین ہے، دیہی خواتین کو مساوی سہولتیں فراہم کرنے کا عزم غیر متزلزل ہے۔

اُنہوں نے کہا کہ حکومتِ پنجاب دیہی خواتین کی فلاح و بہبود کے لیے سرگرم عمل ہے، دیہی خواتین کو علاج کی سہولت فراہم کرنے کے لیے فیلڈ اسپتال پروجیکٹ جاری ہے، دیہات میں بنیادی صحت کے یونٹس کو اپ گریڈ کیا جا رہا ہے۔

مریم نواز نے مزید کہا کہ ورچوئل پولیس اسٹیشن خواتین کے حقوق کا تحفظ یقینی بنانے کے لیے قائم کیا گیا ہے۔

اُنہوں نے یہ بھی کہا کہ دیہی خواتین کے لیے اسکل ڈیولپمنٹ پروگرام کے آغاز پر کام کر رہے ہیں، ان کی معاشی ترقی و خودمختاری کے لیے مویشی بھی مہیا کریں گے۔

قومی خبریں سے مزید