بطور قانون دان ججز کا پتہ ہے کہ کس کیس کا کیا فیصلہ کرینگے: سلمان اکرم راجہ

سیکریٹری جنرل پی ٹی آئی سلمان اکرم راجہ نے کہا ہے کہ بطور قانون دان ہائی کورٹ اور سپریم کورٹ کے ججز کا پتہ ہے کس کیس کا کیا فیصلہ کریں گے۔

لاہور میں میڈیا سے گفتگو کرتے ہوئے سلمان اکرم راجہ نے کہا کہ آئین آزادی رائے کا حق دیتا ہے یہ بنیادی حقوق ہے، جبر کرنے والوں کو کہہ دیا گیا کہ مرضی کا قانون بنا لو۔

انہوں نے کہا کہ کل ہر پاکستانی کے ساتھ ایک واردات ہوئی ہے، عدلیہ نے تیس چالیس سال سے جو آزادی حاصل کی اس کا گلہ گھونٹ دیا گیا۔

سلمان اکرم راجہ کا کہنا ہے کہ ہم عدالتوں میں لڑتے رہیں گے مگر اب مدافعت کے سوا کوئی راستہ نہیں ہے، قانون کی حکمرانی کا خواب اب بہت دور ہو گیا ہے۔

صدر کے دستخط کے بعد 26 ویں آئینی ترمیم نافذ، چیف جسٹس کے تقرر کا طریقہ کار سامنے آ گیا

26 ویں آئینی ترمیم پر صدرِ مملکت آصف علی زرداری نے دستخط کر دیے جس کے بعد ترمیم کا گزٹ نوٹیفکیشن جاری کر دیا گیا۔

پی ٹی آئی کے رہنما نے کہا کہ آئین کی روح پر ایک جعلی اسمبلی سے حملہ کیا گیا، آئینی عدالتوں کے پاس جائیں گے مگر ان آئینی عدالتوں سے اب انصاف نہیں ملے گا۔

ان کا مزید کہنا ہے کہ کل ایک شخص نے محمد علی جناح سمیت اپنے بزرگوں کا نام لے کر پورے نظام اور آئین کو تباہ کر دیا، چارٹر آف ڈیموکریسی بھی دو جماعتوں کے درمیان تھا جو میری نظر میں غلط تھا۔

سلمان اکرم راجہ نے یہ بھی کہا کہ اگر عدالتوں میں آواز بلند نہیں کرنے دیں گے تو ہم سڑکوں پر احتجاج کریں گے، ہم اب آئینی پٹیشن لے کر کس عدالت میں جائیں گے۔