فرمان الہی
نماز کے اوقات
پاکستانی معروف اداکار و فلمساز شہریار منور کی شادی کی تقریبات کا آغاز ہوگیا، ڈھولکی کی ویڈیو منظر عام پر آتے ہی ان کی دلہنیا بھی سامنے آگئی۔
نوجوان حسیناؤں کے دلوں پر راج کرنے والے شہریار منور کے حوالے سے رواں سال جون میں یہ خبر سامنے آئی تھی کہ وہ دسمبر میں شادی کرنے والے ہیں لیکن انہوں نے دلہنیا کے حوالے سے خاموشی اختیار کی ہوئی تھی۔
اب فوٹو اینڈ ویڈیو شیئرنگ پلیٹ فارم انسٹاگرام پر اداکار شہریار منور اور اداکارہ ماہین صدیقی کی شوبز فنکاروں سے سجی ڈھولکی کی دھوم مچ گئی ہے۔
وائرل ویڈیو میں شہریار منور کو ماہین صدیقی کے ہمراہ بیٹھے پاکستانی گلوکار جمی خان کی موسیقی انجوائے کرتے دیکھا جاسکتا ہے۔
ویڈیو میں شہریار منور کتھئی جبکہ ماہین صدیقی زرد جوڑا اور بالوں میں گجرے لگائے ہوئے ہیں اور جمی خان کی گلوکاری سے دونوں ہی لطف اندوز ہو رہے ہیں۔
سوشل میڈیا پر وائرل تصاویر اور ویڈیو سے اندازہ ہوتا ہے کہ ان دونوں کی شادی کی تقریبات کا آغاز ہوگیا ہے۔
ان کی ڈھولکی کی تقریب میں ماہرہ خان، عاصم اظہر، مومل شیخ، عاصم رضا اور دیگر شخصیات شریک تھیں۔
دونوں کی شادی کی تقریبات کی ویڈیوز اور تصاویر مختلف شوبز سوشل میڈیا پیجز کی جانب سے بھی شیئر کی گئیں، جہاں پر مداحوں اور شوبز شخصیات نے جوڑے کے لیے نیک خواہشات کا اظہار کیا۔
یاد رہے کہ شہریار منور نے اس سے قبل متعدد بار اپنی شادی کے حوالے سے تو بتایا تھا لیکن انہوں نے کبھی اپنی دلہنیا کا نام نہیں لیا تھا تاہم ان کی سالگرہ کے موقع پر انہوں نے اداکارہ ماہین صدیقی کے لیے ’جان‘ کا لفظ استعمال کیا تھا جس کے بعد اداکار کا نام ماہین صدیقی کے ساتھ جوڑا جانے لگا تھا۔
