فرمان الہی
نماز کے اوقات
آئی سی سی چیمپئنز ٹرافی ٹورنامنٹ کے لیے پاکستان ٹیم کے اسکواڈ میں پی ایس ایل کی ٹیم ملتان سلطانز کے کھلاڑی سب سے آگے ہیں۔
پاکستان کرکٹ ٹیم کے حوالے سے آئی سی سی چیمپئنز ٹرافی اسکواڈ پر سابق کرکٹرز اور تجزیہ کار تحفظات کا اظہار کر رہے ہیں بالخصوص آل راؤنڈر فہیم اشرف، خوشدل شاہ اور وکٹ کیپر بیٹر عثمان خان کی سلیکشن پر سوالات کیے جارہے ہیں۔
آئی سی سی چیمپئنز ٹرافی 2017ء میں جب پاکستان ٹیم وکٹ کیپر سرفراز احمد کی قیادت میں جیتی تب پاکستان کرکٹ میں 1992ء ورلڈ کپ اور 2009ء ٹی 20 ورلڈ کپ کی جیت کے بعد پاکستان کرکٹ کی اس سب سے بڑی فتح کو پی ایس ایل کے پاکستان کرکٹ کے منظر نامے پر ابھرنے کو قرار دیا جا رہا تھا۔
پاکستان سپر لیگ کا پہلا ایڈیشن 2016ء میں منعقد ہوا تھا اور جب پاکستان آئی سی سی چیمپئنز ٹرافی میں فاتح بن کر وطن لوٹا تو ایک عام تاثر یہی تھا کہ پاکستان سپر لیگ سے پاکستان کرکٹ کو نئے ستارے ملے،جنہوں نے وائٹ بال کرکٹ میں پاکستان کو ایک بڑا عالمی اعزاز دلوانے میں مرکزی کردار ادا کیا۔
حالانکہ یہ بات بھی یاد رکھنے کی تھی کہ پاکستان سپر لیگ 20 اوورز اور چیمپئنز ٹرافی 50 اوورز کا آئی سی سی ایونٹ ہے جبکہ آئی سی سی چیمپئنز ٹرافی 2017ء کے پاکستانی اسکواڈ میں اسلام آباد یونائیٹڈ کے شاداب خان ہی ایسے کھلاڑی تھے جو پاکستان سپر لیگ کی پرفارمنس پر قومی اسکواڈ میں شامل ہوئے تھے۔
آئی سی سی چیمپئنز ٹرافی 2025ء کے پاکستانی اسکواڈ پر نگاہ ڈالی جائے تو 15 رکنی ٹیم میں سب سے زیادہ 5 کھلاڑیوں کا تعلق ملتان سلطانز کیساتھ ہے، ان کھلاڑیوں میں وکٹ کیپر بیٹر کپتان محمد رضوان ،عثمان خان، کامران غلام، طیب طاہر اور فاسٹ بولر محمد حسنین شامل ہیں۔
پاکستان سپر لیگ کی دو بار کی چیمپئن لاہور قلندرز کے تین کھلاڑی شاہین شاہ آفریدی، حارث رؤف اور جارح مزاج اوپنر فخر زمان جن کی قومی ٹیم میں واپسی ہوئی ہے اسکواڈ کا حصہ ہیں۔
کوئٹہ گلیڈی اٹرز کے بھی 3 ہی کھلاڑی قومی ٹیم میں منتخب ہوئے جن میں آل راؤنڈر فہیم اشرف، سعود شکیل اور مسڑی اسپنر ابرار احمد شامل ہیں۔
پاکستان سپر لیگ 2025ء کی دفاعی چیمپئن اسلام آباد یونائیٹڈ کے 2 کھلاڑی آغا سلمان اور فاسٹ بولر نسیم شاہ جبکہ کراچی کنگز کے خوشدل شاہ اور پشاور زلمی کے بابر اعظم ایک ایک کھلاڑی ہیں جو آئی سی سی چیمپئنز ٹرافی میں پاکستانی اسکواڈ کا حصہ بنے ہیں۔
