فرمان الہی
نماز کے اوقات
نایاب مچھلی بلیک سی ڈیول پہلی بار سمندر کی سطح پر دیکھی گئی۔
نایاب اور خوفناک نظر آنے والی مچھلی بلیک سی ڈیول (Black Sea devil) کو پہلی بار سمندر کی سطح کے قریب تیرتے ہوئے دیکھا گیا ہے۔
یہ حیرت انگیز نظارہ اسپین کے قریب کینری جزائر میں دکھائی دیا، جب ہسپانوی تحقیقاتی ٹیم سمندر میں شارک پر تحقیق کر رہی تھی، ٹیم کے ساتھ مشہور سمندری فوٹو گرافر ڈیوڈ جارا بوگونا بھی موجود تھے، جنہوں نے اس مچھلی کی ویڈیو بنائی۔
یہ مچھلی عام طور پر سمندر کی گہرائی میں 650 سے 6500 فٹ کے درمیان پائی جاتی ہے، سطح کے قریب اس کی موجودگی ایک غیر معمولی واقعہ ہے۔
سیاہ رنگت والی مچھلی اپنے تیز دانتوں اور سر پر موجود روشنی پیدا کرنے والے عضو کی وجہ سے مشہور ہے، جو شکار کو اپنی طرف متوجہ کرنے کے لیے استعمال ہوتا ہے، جیسے ہی کوئی چھوٹی مچھلی روشنی کے قریب آتی ہے، یہ فوراً اسے نگل لیتی ہے۔
ماہرین کا خیال ہے کہ اس مچھلی کا سطح کے قریب آنا ممکنہ طور پر بیماری یا کسی شکاری سے بچنے کی کوشش کا نتیجہ ہو سکتا ہے۔
اس واقعے نے دنیا بھر میں ماہرین کی توجہ حاصل کر لی ہے اور سمندری حیات کی تحقیق میں نئی راہیں کھولی ہیں۔
