فرمان الہی
نماز کے اوقات
سائنسدانوں کا کہنا ہے کہ ایک رات کی بے سکونی کے بھی انسانی صحت پر سنگین اثرات مرتب ہو سکتے ہیں۔
داسمان ذیابیطس انسٹی ٹیوٹ کویت کے سائنسدانوں کی ایک نئی تحقیقاتی رپورٹ کے مطابق صرف ایک رات کی خراب نیند انسان کے مدافعتی نظام کو کمزور کرنے کے لیے کافی ہو سکتی ہے۔
رپورٹ میں بتایا گیا ہے کہ مسلسل نیند پوری نہ ہونے سے انسان موٹاپے، دل کی بیماریوں اور ذیابیطس جیسے امراض میں مبتلا ہو سکتا ہے۔
رپورٹ کے مطابق نیند کی کمی جسم کے قدرتی مدافعتی نظام کو متاثر کرتی ہے جس کی وجہ اسے کسی بھی قسم کے انفیکشن سے لڑنے میں دشواری ہوتی ہے۔
رپورٹ میں بتایا گیا ہے کہ جب انسان سو رہا ہوتا ہے تو اس کے جسم کا بلڈ پریشر کم ہو جاتا ہے جس کی وجہ سے خون کی شریانوں میں نرمی آ جاتی ہے جو کہ انسان کے مدافعتی نظام کے لیے بہت ضروری ہے تاہم نیند میں خلل پڑنے کی وجہ سے مدافعتی نظامِ عمل درہم برہم ہو جاتا ہے۔
تحقیقاتی ٹیم کی سربراہ ڈاکٹر فاطمہ الراشد کا اس حوالے سے کہنا ہے کہ ٹیکنالوجی میں ترقی، اسکرین ٹائم میں اضافہ اور بدلتے ہوئے معاشرتی اصول نیند کے اوقات میں مسلسل خلل ڈال رہے ہیں جس کے مدافعتی نظام اور انسان کی مجموعی صحت کے لیے گہرے مضمرات ہیں۔
محققین نے یہ امید ظاہر کی ہے کہ مستقبل میں تحقیق کے ذریعے یہ وضاحت کرنے کی کوشش کریں گے کہ نیند پوری نہ ہونے سے مدافعتی نظام کیوں متاثر ہوتا ہے اور اس کی وجہ سے انسان کے موٹاپے، ذیابیطس اور دل کی بیماریوں کے شکار ہونے کے خطرے کو کیسے کم کیا جا سکتا ہے۔
