فرمان الہی
نماز کے اوقات
پنجاب، خیبر پختون خوا اور استور میں بارش اور شدید برف باری کے باعث سیاح پھنس گئے۔
گجرات، سرگودھا، جھنگ، ڈیرہ غازی خان، کوٹ ادو، چیچہ وطنی سمیت پنجاب کے مختلف علاقوں میں بارش ہوئی۔
شکر گڑھ، حافظ آباد، کمالیہ اور وہاڑی میں بھی بادل برسنے سے ٹھنڈ بڑھ گئی۔
گزشتہ رات اوباڑو اور گھوٹکی میں بھی بارش ہوئی، لوئر دیر کے مختلف علاقوں میں بھی موسلادھار بارش نے جل تھل ایک کر دیا۔
ادھر گلیات، وادیٔ نیلم اور وادیٔ لیپا میں شدید برف باری سے ٹریفک کی روانی متاثر ہونے سے سیاح مشکلات کا شکار ہو گئے، مواصلاتی نظام بھی درہم برہم ہو گیا۔
استور میں تیسرے روز بھی برف باری کا سلسلہ جاری ہے اور بالائی علاقوں کا زمینی رابطہ منقطع ہے، 3 روز سے جاری برف باری کے باعث بجلی اور پانی کی سپلائی معطل ہے۔
استور کے کئی بالائی علاقوں میں 3 سے 4 فٹ تک برف پڑ چکی ہے جس سے نظامِ زندگی درہم برہم ہے، خچک کے مقام پر برفانی تودہ گرنے سے استور ویلی روڈ بلاک ہو گیا۔
علاوہ ازیں شدید برف باری کے باعث آزاد کشمیر کی وادیٔ لیپا اور کیل سیری کے مقام پر پھنسے 200 کے قریب سیاحوں کو بحفاظت ریسکیو کر لیا گیا، برفانی تودے گرنے سے شاردہ تاؤبٹ مرکزی شاہراہ متعدد مقامات پر بند ہو گئی۔
محکمۂ موسمیات نے آج بالائی خیبر پختون خوا، بلوچستان، پنجاب، خطہ پوٹھوہار، اسلام آباد، کشمیر اور گلگت بلتستان میں مزید بارش اور پہاڑوں پر برف باری کی پیش گوئی کی ہے۔
