فرمان الہی
نماز کے اوقات
گوگل نے پاکستان میں گوگل والٹ کی باضابطہ دستیابی کا اعلان کر دیا، جس کے ذریعے صارفین اپنی اینڈرائیڈ ڈیوائسز پر ڈیجیٹل پیمنٹ کارڈز، بورڈنگ پاسز اور لائلٹی کارڈز کو محفوظ کر سکتے ہیں۔
یہ سروس پاکستان میں ڈیجیٹل ادائیگیوں کے رجحان کو فروغ دینے اور صارفین کے لیے لین دین کو مزید آسان بنانے کے لیے متعارف کرائی گئی ہے۔
گوگل کے مطابق پاکستان میں متعدد بینکوں کے صارفین اب اپنے ڈیبٹ اور کریڈٹ کارڈز کو گوگل والٹ سے منسلک کر سکتے ہیں، جس سے وہ اپنے اینڈرائیڈ فونز اور ویئر او ایس ڈیوائسز کے ذریعے کانٹیکٹ لیس ادائیگیاں کر سکیں گے۔
گوگل نے یہ بھی اعلان کیا ہے کہ آنے والے مہینوں میں مزید بینکوں کو اس سروس میں شامل کیا جائے گا۔
اس سروس کے ذریعے صارفین کانٹیکٹ لیس ٹرمینلز پر ادائیگیاں، آن لائن خریداری اور ان ایپ ٹرانزیکشنز جیسے فوائد حاصل کر سکتے ہیں۔
گوگل والٹ صرف ادائیگیوں تک محدود نہیں بلکہ اس کے ذریعے مختلف سفری اور تجارتی خدمات کو بھی ڈیجیٹل طور پر اسٹور کیا جا سکتا ہے۔
اس کے ذریعے مسافر اپنی منتخب ایئر لائنز کے بورڈنگ پاسز محفوظ کر سکتے ہیں، آن لائن ٹکٹنگ پلیٹ فارمز کے ذریعے خریدے گئے ٹکٹ گوگل والٹ میں محفوظ کیے جا سکتے ہیں۔
گوگل نے اس سروس میں سیکیورٹی کو بنیادی اہمیت دی ہے، گوگل والٹ ٹوکنائزیشن کا استعمال کرتا ہے، جس کی مدد سے مالیاتی ڈیٹا کو محفوظ بنایا جاتا ہے۔
اگر کسی صارف کا فون گم یا چوری ہو جائے تو فائنڈ مائی ڈیوائس فیچر کی مدد سے صارف اپنے ڈیٹا کو لاک یا مکمل طور پر حذف کر سکتا ہے تاکہ اس کا غلط استعمال نہ ہو سکے۔
گوگل والٹ کی دستیابی پاکستان میں ڈیجیٹل معیشت کی ترقی کے لیے ایک اہم پیش رفت ہے، اس سروس سے ناصرف صارفین بلکہ کاروباری ادارے بھی تیز، محفوظ اور جدید ڈیجیٹل ادائیگیوں سے مستفید ہو سکیں گے۔
