فرمان الہی
نماز کے اوقات
سیریز کے ابتدائی 2 میچز ہارنے کے بعد پاکستان ٹیم نے آج نیوزی لینڈ کو تیسرے میچ میں کرارا جواب دے کر میچ 9 وکٹ سے جیت لیا۔
تیسرے ٹی ٹوئنٹی میچ میں نیوزی لینڈ نے پاکستان کو جیت کے لیے 205 رنز کا ہدف دیا تھا جو قومی ٹیم نے ایک وکٹ کے نقصان پر حاصل کر لیا۔
آکلینڈ میں کھیلے جا رہے میچ میں پاکستان نے نیوزی لینڈ کے خلاف ٹاس جیت کر پہلے بولنگ کرانے کا فیصلہ کیا تھا۔
میچ میں پاکستان کا پہلے بولنگ کرانے کا فیصلہ صحیح ثابت ہوا، شاہین آفریدی نے پہلے ہی اوور میں کیوی بیٹر فن ایلن کو آؤٹ کر دیا۔
پہلی وکٹ گرنے کے بعد نیوزی لینڈ نے پلٹ کر جواب دیا اور تیز بیٹنگ کر کے 4 اوورز میں اسکور 43 تک پہنچا دیا جس کے بعد ٹم سائفرٹ 19 رنز بنا کر حارث رؤف کا شکار بن گئے۔
بعد ازاں میچ میں 5 اوورز کے بعد افطار کے لیے وقفہ دیا گیا تو اس دوران پاکستان کرکٹ ٹیم کے کھلاڑیوں نے میدان میں روزہ افطار کیا۔
دوسری وکٹ گرنے کے بعد بھی نیوزی لینڈ کے بیٹرز نے تیز رن ریٹ کے ساتھ بیٹنگ جاری رکھی اور 9 اوورز میں اسکور 98 تک پہنچا دیا، اس دوران مارک چیپمین نے 29 گیندوں پر 1 چھکے اور 7 چوکوں کی مدد سے ففٹی بنائی۔
اس کے بعد اگلے اوور کی پہلی ہی گیند پر شاداب خان نے ڈیرل مچل کو 17 رنز پر کیچ آؤٹ کرایا۔
پاکستان کے خلاف نیوزی لینڈ کی چوتھی وکٹ 11.5 اوورز میں 135 رنز پر گری، جب جیمز نیشم کو 3 رنز پر محمد عباس نے آؤٹ کیا۔
اگلے اوور میں پاکستان نے نیوزی لینڈ کی اہم ترین وکٹ 141 رنز پر حاصل کر لی، جارحانہ انداز میں بیٹنگ کرنے والے مارک چیپمین 44 گیندوں پر 94 رنز بنا کر شاداب خان کی گیند پر کیچ آؤٹ ہوئے۔
اس کے بعد نیوزی لینڈ کی لگاتار 2 گیندوں پر 2 وکٹس 15 ویں اوور میں ابرار احمد نے 164 رنز پر گرائیں۔
نیوزی لینڈ کی آٹھویں وکٹ 19 ویں اوور میں 193 اور نویں وکٹ 194 رنز پر گری، یہ دونوں وکٹس حارث رؤف کے حصے میں آئیں۔
نیوزی لینڈ کی آخری وکٹ 19.5 اوورز میں 204 رنز پر گری۔
پاکستان ٹیم نے ہدف کے تعاقب کا آغاز شاندار اور جارحانہ انداز میں کیا، پاکستانی اوپنرز محمد حارث اور حسن نواز نے تیز بیٹنگ کے ذریعے ٹیم کو مضبوط آغاز فراہم کیا۔
دونوں اوپنرز نے پاور پلے کے 6 اوورز کا بہت ہی خوبصورتی اور مہارت کے ساتھ فائدہ اٹھایا اور پارٹنر شپ قائم کر کے 5.5 اوورز میں اسکور 74 تک پہنچا دیا جس کے بعد محمد حارث 20 گیندوں پر 41 رنز بنا کر آؤٹ ہو گئے۔
پہلی وکٹ گرنے کے کے بعد بھی پاکستانی بیٹرز نے ہدف پر نظریں جما کر تیز بیٹنگ جاری رکھی اور 10 اوورز میں اسکور 124 تک پہنچا دیا۔
اس دوران حسن نواز نے اپنی نصف سنچری بھی مکمل کی جبکہ دوسرے اینڈ سے کپتان سلمان آغا نے بھی تیز رن ریٹ کے ساتھ بیٹنگ جاری رکھی۔
دونوں بیٹرز کی تیز بیٹنگ اور پارٹنر شپ کی بدولت پاکستان نے با آسانی میچ 4 اوورز پہلے ختم کر دیا۔
حسن نواز 105 اور سلمان آغا 51 رنز بنا کر ناٹ آؤٹ رہے۔
آکلینڈ میں کھیلے گئے میچ میں پاکستان ٹیم میں عباس آفریدی اور ابرار احمد کو شامل کیا گیا جبکہ محمد علی اور جہانداد خان کو ٹیم سے ڈراپ کیا گیا۔
قومی ٹیم میں محمد حارث، حسن نواز، سلمان علی آغا، عرفان نیازی، شاداب خان، عبدالصمد، خوشدل شاہ، شاہین آفریدی اور حارث رؤف شامل ہیں۔
