فرمان الہی
نماز کے اوقات
فراڈ کیس میں گرفتار معروف اداکارہ و ماڈل نادیہ حسین کے شوہر ملزم عاطف خان نے 8 سالوں میں کمپنی اکاؤنٹ سے 1 ارب سے زائد روپے ذاتی اکاؤنٹ میں منتقل کرکے ٹریڈنگ کی۔
کراچی کی جوڈیشل مجسٹریٹ شرقی کی عدالت میں معروف اداکارہ و ماڈل نادیہ حسین کے شوہر عاطف خان کی جانب سے کیے گئے فراڈ کیس کی سماعت کے دوران فیڈرل انویسٹی گیشن ایجنسی (ایف آئی اے) نے 55 صفحات پر مشتمل کیس کا عبوری چالان جمع کروا دیا۔
کمپنی کے ریکارڈ کے مطابق ملزم عاطف نے ذاتی ٹریڈنگ اکاؤنٹ بنا رکھا تھا، فروری 2016 سے دسمبر2023 تک ملزم کےاکاؤنٹ میں کمپنی سے 1.429 ارب روپے منتقل ہوئے، ملزم نےان فنڈز کو ذاتی ٹریڈنگ کےلیے استعمال کیا، ملزم کی جانب سے 1.322 ارب روپے کمپنی اکاؤنٹ میں واپس کیے گئے۔
ایف آئی اے کی جانب سے جمع کروائے گئے چالان کے متن کے مطابق کیس میں ایک ملزم عاطف خان گرفتار ہے، کیس میں ایک ملزم فیصل محمود شیخ ضمانت پر رہا ہے، ملزمان کےخلاف کمپنی فنڈ ذاتی استعمال کرنے، فراڈ، مس کنڈکٹ سمیت متعدد الزامات ہیں، انکوائری کےدوران مختلف بینکس، ایس ای سی پی، پاکستان اسٹاک ایکسچینج و دیگر سے ریکارڈ حاصل کیا گیا۔
چالان کے مطابق ملزم عاطف خان کو 8 مارچ 2025 کو گرفتار کیا گیا ہے، دوران جسمانی ریمانڈ ملزم سے تفتیش کی گئی ہے، ملزم کو عدالت نے 18 مارچ کو عدالتی ریمانڈ پر جیل بھیج دیا۔
ملزمان کے خلاف ایک سیکیورٹیز کمپنی کےچیئرمین کی شکایت پر کارروائی کی گئی، بینک اکاؤنٹس ٹرانسفر سے فائدہ اٹھانے والوں میں ملزم کی اہلیہ کے سیلون کا اکاؤنٹ بھی شامل ہے، ملزم کے بینک اکاؤنٹ سے فائدہ اٹھانے والوں کو تحقیقات کے لیے بلایا جائے گا۔
ایف آئی اے کا کہنا ہے کہ ملزم نے کمپنی فنڈز سے خریدے گئے شیئرز سے 3 کروڑ 14 لاکھ سے زائد کے ڈیویڈنڈ ذاتی اکاؤنٹ میں جمع کروائے، ملزم نے ذاتی ٹریڈنگ کےلیےتھرڈ پارٹیز سے مختصر دورانیہ کیلئے 65 کروڑ کے فنڈز حاصل کیے، ملزم نے کمپنی اکاؤنٹس کے ذریعے فنڈز مارک اپ کے ساتھ واپس کیے، ملزم کی جانب سےکمپنی کو واجب الادا رقم 54 کروڑ روپے ہے۔
چالان کے متن میں مزید بتایا گیا کہ کمپنی کے ریکارڈ کے مطابق ملزم عاطف حسین نے ذاتی ٹریڈنگ اکاؤنٹ بنا رکھا تھا، فروری 2016 سے دسمبر2023 تک ملزم کے اکاؤنٹ میں کمپنی سے 1.429 ارب روپے منتقل ہوئے، ملزم نے ان فنڈز کو ذاتی ٹریڈنگ کےلیے استعمال کیا، ملزم کی جانب سے 1.322 ارب روپے کمپنی اکاؤنٹ میں واپس کیے گئے۔
