• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

انٹرفیتھ تقریب، مختلف مذہبی اورثقافتی برادریوں کے اتحاد کامظاہرہ

میرا شہر
لاہور
12 اپریل ، 2025
لاہور(اپنے نامہ نگار سے)فیسز پاکستان کی جانب سے نجی ہوٹل میں انٹرفیتھ تقریب ہوئی ، جس میں ملک کی مختلف مذہبی اور ثقافتی برادریوں نے مل کر عید ملن پارٹی، بیساکھی، ہولی اور نوروز کی مشترکہ خوشیاں منائیں۔ تقریب کی صدارت فیسز پاکستان کے صدر جاوید ولیم نے کی۔ سسٹر جینوویو رام لال نے کہاکہ ہم ایک چھت تلے سب جمع ہیں اور ہمارے درمیان کوئی دیوار نہیں ہے ۔ اعجاز عالم آگسٹین نے کہا کہ 2018 میں انٹرفیتھ پالیسی کی بنیاد رکھنے کے بعد فیسز پاکستان نے اس مشن کو جس انداز میں آگے بڑھایا ہے، وہ قابلِ ستائش ہے ۔ چئیر مین کل مسالک بورڈ مولانا عاصم مخدوم نے کہا کہ آج ہم نے عملی طور پر یہ دکھا دیا کہ انسانیت، محبت اور رواداری ہی ہمارے درمیان اصل رشتہ ہیں۔بہائی کمیونٹی سےنعمان خان نے نوروز کی اہمیت پر روشنی ڈالی، جبکہ ہندو کمیونٹی کے کھیت کمار اور امر ناتھ رندھاوا نے ہولی کو رنگوں کا تہوار قرار دیا۔ پروفیسر کلیان سنگھ کلیان ، مفتی عاشق حسین ، پروفیسر ڈاکٹر مسعود مجاہد ، پیٹر چالرس سہوترہ، ڈائریکٹر انسانی حقوق محمد یوسف،مہناز جاوید ، سسٹر جینیویو اور دیگر نے اپنے خیالات کا اظہار کرتے ہوئے فیسز پاکستان بالخصوص جاوید ولیم کی انٹرفیتھ میں کاوشوں کو خراجِ تحسین پیش کیا ۔ اس رنگا رنگ تقریب میں پنجابی، سندھی، بلوچی اور فوک رقص کے ساتھ ساتھ ایک خصوصی ڈرامائی خاکہ پیش کیا گیا۔
لاہور سے مزید