فرمان الہی
نماز کے اوقات
اداکارہ علیزے شاہ نےنفرت کرنے والوں سے دل سے اپیل کرتے ہوئے کہا ہے کہ براہِ مہربانی نرم دل رہیں، ہر کوئی باہر سے جتنا مضبوط دکھائی دیتا ہے، اندر سے اتنا مضبوط نہیں ہوتا۔
نوجوان اور باصلاحیت اداکارہ علیزے شاہ پروگرام سپر اسٹار سے اپنے کیریئر کا آغاز کر کے عہدِ وفا میں ڈاکٹر دعا کے کردار سے مقبولیت کی انتہا کو پہنچی تھیں، آج کل ایک بار پھر خبروں میں ہیں۔
اداکاری میں اپنے منفرد انداز اور کیوٹ لک سے ناظرین کا دل جیتنے والی علیزے شاہ اب سوشل میڈیا پر اپنے بولڈ انداز، خود اعتمادی اور تنقید کا سامنا کرنے والے رویے کی وجہ سے زیرِ بحث ہیں۔
علیزے شاہ نے اپنے کیریئر میں کئی ہٹ ڈرامے کیے، لیکن ساتھ ہی ساتھ ان کے گرد کئی تنازعات بھی گردش کرتے رہے، جن میں غیر پیشہ ورانہ رویہ، سگریٹ نوشی اور ساتھی فنکاروں سے جھگڑوں جیسے الزامات شامل ہیں۔
وقت کے ساتھ ساتھ وہ اپنی شخصیت اور انداز میں کافی تبدیلیاں لائیں اور اب وہ اپنی سوشل میڈیا پوسٹس میں اپنا اصل روپ دکھانا پسند کرتی ہیں۔
حال ہی میں علیزے شاہ کو ان کے لباس اور سوشل میڈیا پر اپ لوڈ کیے جانے والے منصوبوں پر شدید تنقید کا سامنا کرنا پڑا، اکثر تبصروں میں ان کی ذاتی زندگی پر سوالات اٹھائے جاتے ہیں۔
ان تمام باتوں سے تنگ آ کر علیزے شاہ نے انسٹاگرام پر ایک جذباتی پیغام شیئر کیا ہے جس میں انہوں نے کہا ہے کہ مجھے نہیں معلوم کہ میں کچھ بھی کروں، مجھے اس پر نفرت کیوں ملتی ہے؟ جو بھی کرتی ہوں، لوگ مذہب کے نام پر میرے خلاف ہو جاتے ہیں، جب کہ میں اپنی زندگی اور اپنے ایمان کے معاملے میں کسی کو پریشان نہیں کرتی۔
انہوں نے یہ بھی کہا کہ ایمان ایک بہت ذاتی معاملہ ہے اور میں کسی پر اپنی رائے نہیں تھوپتی، میری سب سے گزارش ہے کہ نرم دلی سے بات کریں، کیونکہ ہر کوئی جتنا باہر سے مضبوط دکھائی دیتا ہے، وہ اندر سے اتنا نہیں ہوتا۔
