فرمان الہی
نماز کے اوقات
ویمنز کرکٹ ورلڈ کپ کےلیے کوالیفائی کرنے والی پاکستانی ٹیم کی کپتان فاطمہ ثناء نے کہا ہے کہ ورلڈ کپ کےلیے دباؤ نہیں، جو بھی ٹیم ہوگی اچھا کھیلیں گے۔
ورلڈ کپ کوالیفائی کے بعد جیو نیوز سے کپتان فاطمہ ثناء، سدرا نواز، نتالیہ پرویز، گل فیروزہ، نجیہا علوی، شوال ذوالفقار، ڈیانا بیگ اور سدرا امین نے گفتگو کی۔
فاطمہ ثناء نے مزید کہا کہ ورلڈ کپ کےلیے کوالیفائی کرنے کے لیے کافی دیر سے محنت کر رہی تھیں، ہوم گراؤنڈ کا دباؤ بھی تھا شکر ہے سب کھلاڑی پلان کے مطابق کھیلیں۔
انہوں نے کہا کہ ورلڈ کپ کا دباؤ نہیں ہے، جو بھی ٹیم ہو گی اچھا کھیلیں گی، اگلے چار ماہ ہم ورلڈ کپ کے لیے مزید محنت کریں گی۔
ٹیم کی کپتان نے یہ بھی کہا کہ ورلڈ کپ میں بھی اچھا کھیلیں گی تاکہ پاکستان میں خواتین کرکٹ کے لیے جو رکاوٹیں ہیں وہ ختم ہوں۔
سدرا نواز نے کہا کہ کوالیفائیر کے سفر آسان نہیں تھا ہم نے اس کے لیے بہت محنت کی ہے، ابھی ہمارا فوکس آخری میچ پر ہے ناقابل شکست رہ کر ورلڈ کپ میں جانا چاہیں گے پھر ورلڈ کپ پر فوکس ہو گا۔
نتالیہ پرویز نے کہا کہ ہمارے لیے میچز مشکل رہے ہیں لیکن شکر ہے ہم نے کوالیفائی کیا، ورلڈ کپ میں بھی ٹیموں کو ٹف ٹائم دیں گے۔
انہوں نے کہا کہ ورلڈ کپ کی ٹیموں کےنام بڑے ہیں لیکن ہماری ٹیم محنت کر رہی ہے اور بہتر ہو رہی ہے، کارکردگی اوپر نیچے ہوتی رہتی ہے فینز کو سپورٹ کرنا چاہیے۔
نتالیہ پرویز نے مزید کہا کہ چار میچز میں ناقابل شکست رہے ہیں یہ کوئی تکا نہیں ہے ہماری پرفارمنس اچھی رہی ہے۔
گل فیروزہ نے کہا کہ کوالیفائی کر کے بہت خوش ہیں اس سے اعتماد میں اضافہ ہوا ہے جبکہ نجیہا علوی نے کہا کہ کوالیفائنگ راؤنڈ میں اچھی ٹیمیں تھیں ہماری آل راؤنڈ پرفارمنس رہی۔
شوال ذوالفقار نے کہا کہ خوشی اور اعزاز کی بات ہے کہ اب تک ناقابل شکست ہیں ورلڈ کپ کے لیے کوالیفائی کیا ہے، تمام کھلاڑیوں نے اپنا اپنا حصہ ڈالا ہے یہی مومنٹم برقرار رکھیں گے۔
ڈیانا بیگ نے کہا کہ ویمن کرکٹ کے لیے یہ ایک مثبت چیز ہے گزشتہ برس ہمارا اچھا نہیں رہا تھا، ہر کھلاڑی کو اپنے رول کا علم ہے اور وہ اسی کے مطابق کھیل رہی ہیں۔
سدرا امین نے کہا کہ کامیابی بہت معنی رکھتی ہے کریڈٹ سب کھلاڑیوں کو جاتا ہے، ہمارے اعتماد میں اضافہ ہوا ہے اسی کو آگے لے کر جائیں گی، میری جیسی فارم ہے میں چاہوں گی کہ ورلڈ کپ میں بھی ایسی ہی ہو۔
