فرمان الہی
نماز کے اوقات
آسٹریلیا نے بھارت کی چند ریاستوں اور مقبوضہ کشمیر سے تعلق رکھنے والے درخواست دہندگان کےلیے اسٹوڈنٹ ویزا کی شرائط سخت کردی، جبکہ کچھ آسٹریلوی جامعات نے ان ریاستوں سے درخواستیں قبول کرنا بند کردیں۔
یہ اقدام پنجاب، ہریانہ، اتر پردیش، راجستھان، گجرات اور مقبوضہ جموں و کشمیر سے جعلی یا غیر مستند درخواستوں میں اضافے کے باعث کیا گیا ہے، جہاں بعض افراد تعلیمی ویزا کو مستقل رہائش حاصل کرنے کےلیے استعمال کر رہے ہیں۔
غیرملکی میڈیا رپورٹس کے مطابق بعض آسٹریلوی جامعات نے ان علاقوں سے درخواستیں قبول کرنا بند کر دیا جبکہ دیگر نے درخواست دہندگان کےلیے اضافی تصدیقی عمل متعارف کروایا ہے۔
رپورٹس کے مطابق یہ اقدامات آسٹریلیا کے تعلیمی نظام کی ساکھ کو برقرار رکھنے کے لیے کیے جا رہے ہیں۔
آسٹریلوی حکام نے تعلیمی ویزا کے غلط استعمال پر تشویش کا اظہار کیا ہے، جو ملک کی معیشت میں اہم کردار ادا کرنے والے بین الاقوامی تعلیمی شعبے کی سالمیت کو متاثر کر سکتا ہے۔
یہ پابندیاں بھارت سے آسٹریلیا جانے والے حقیقی طلبہ کےلیے مشکلات پیدا کر سکتی ہیں اور تعلیم کے شعبے میں دونوں ممالک کے تعلقات پر اثر انداز ہو سکتی ہیں۔
اگرچہ یہ پابندیاں تمام اداروں پر یکساں لاگو نہیں ہوئیں، لیکن جن جامعات کو غیر مستند درخواستوں کی زیادہ تعداد کا سامنا ہے وہ آسٹریلوی محکمہ داخلہ کے ساتھ مل کر اپنے داخلہ کے عمل کو سخت کر رہی ہیں۔
